தாலிக்கு தங்கம் வழங்க அமைச்சர் சரோஜா கமி‌ஷன் கேட்கிறார்: வெற்றிவேல் எம்.எல்.ஏ. புகார்

தாலிக்கு தங்கம் வழங்கும் திட்ட பயனை ஆர்.கே. நகரிலும், எனது தொகுதியிலும் அமைச்சர் கொடுக்கவில்லை. அந்த திட்டத்தின் கீழ் ரூ.25 ஆயிரம் கொடுக்க வேண்டும் என்றால் ரூ.2,500-ம், 50 ஆயிரம் வழங்க ரூ.5 ஆயிரமும் கமி‌ஷன் வேண்டும் என்று அமைச்சர் சரோஜா கேட்கிறார்.

இந்த குற்றச்சாட்டை முதல்வரிடம் தெரிவித்தேன். அவசரப்பட வேண்டாம் என்றும் இது பற்றி விசாரிப்பதாகவும் முதல்- அமைச்சர் தெரிவித்தார். கமி‌ஷன் பிரச்சனையால் என் தொகுதியில் இன்னும் தாலிக்கு தங்கம் வழங்கப்படவில்லை.

அ.தி.மு.க. விதிகளில் கடைசிக்கு முந்தைய விதியில் (45) பொதுச்செயலாளருக்கு ஒரு அதிகாரம் வழங்கப்பட்டுள்ளது. அதன்படி அவ்வப்போது எழும் சூழ்நிலைகளுக்கு ஏற்ப நியாயமான காரணம் இருப்பதாக பொதுச்செயலாளர் கருதினால் கட்சிக்கான சட்ட விதிகள் எதையும் தளர்த்துவதற்கும் விதிவிலக்கு அளிப்பதற்கும் பொதுச்செயலாளருக்கு அதிகாரம் உள்ளது.

1976-ம் ஆண்டில் இருந்து அந்த விதி அமலுக்கு வந்துள்ளது. ஒரு அசாதாரண சூழ்நிலையில் ஜெயலலிதா பொதுச்செயலாளராக நியமிக்கப்பட்டார். அப்போது பொதுக்குழு கூடி அவரை பொதுச்செயலாளராக தேர்வு செய்தது. அதன் பிறகு நடந்த கட்சி தேர்தலில் பொதுச்செயலாளராக தேர்ந்தெடுக்கப்பட்டார்.

அ.தி.மு.க. பொதுச்செயலாளராக ஜெயலலிதா பொறுப்பேற்ற போது என்ன விதிமுறை கடைப்பிடிக்கப்பட்டதோ அதே விதிமுறையைத்தான் சசிகலா பொதுச்செயலாளர் பதவி ஏற்றதிலும் பின்பற்றப்பட்டது. அம்மா பொதுச்செயலாளராக நியமிக்கப்பட்டு செயல்பட்ட போது கட்சி நடவடிக்கைகளை எடுத்தாரோ அது போலத்தான் சசிகலாவும் புதிய நிர்வாகிகள் நியமனம், நீக்கம் போன்றவற்றை மேற்கொண்டார்.

இது ஓ.பன்னீர்செல்வம், எடப்பாடி பழனிசாமி போன்றவர்களுக்கு நன்றாக தெரியும். இதனை ஏற்றுக்கொண்டதன் மூலம்தான் சசிகலா பொதுச்செயலாளராக தேர்வு செய்யப்பட்டார்.

அப்போது ஏற்றுக்கொண்ட ஓ.பி.எஸ்., எடப்பாடி உள்ளிட்ட தலைமை நிர்வாகிகள் இப்போது மறுப்பது ஏன்? அம்மாவிற்கு பின்பற்றப்பட்ட விதிமுறைகளை பின்பற்றித் தான் நாங்கள் செல்கிறோம்.