கூடங்குளம் அணுமின் நிலையத்தால் மக்கள் மிகப்பெரிய அழிவு திட்டத்திற்குள் சிக்கி உள்ளார்கள்: உதயகுமார்

கூடங்குளம் அணுமின் திட்டம் தொடங்கப்பட்ட நாள் முதலே நாங்கள் எதிர்த்து கொண்டிருக்கிறோம். கூடங்குளம் அணுமின் நிலையத்திற்கு தேவையான கொதிகலன்கள், உதிரி பாகங்கள் வாங்கியதில் மிகப்பெரிய அளவில் முறைகேடு நடந்திருக்கிறது. கூடங்குளம் அணுமின் நிலைய கட்டுமானத்திலும், ஒப்பந்தங்கள் கொடுப்பதிலும் மிகப்பெரிய அளவில் முறைகேடு நடந்திருப்பதாக நாங்கள் ஆதாரங்களுடன் சொன்னோம்.

ஆனால் எந்த விசாரணையும் நடத்தாமல் மத்திய, மாநில அரசுகள் தொடர்ந்து இந்த திட்டத்தை அமல்படுத்தி கொண்டிருந்தார்கள். பயனாளிகளுக்கு வீடுகள் கட்டி கொடுக்கும் திட்டத்தில் கூட முறைகேடு நடந்து கொண்டிருக்கிறது.

கூடங்குளம் அணுமின் நிலையத்தில் மாபெரும் குளறுபடிகள் நடந்திருப்பதாக தற்போது தகவல்கள் கசிய தொடங்கியுள்ளது. கூடங்குளம் அணுமின் நிலையம் ஒரு மிகப்பெரிய மோசடி திட்டம். அங்கே குளறுபடிகள், கோளாறுகள் நிறைய நடந்திருக்கின்றன. இவ்வளவு பிரச்சினைகளை வைத்து கொண்டு இந்த திட்டத்தை நடைமுறைப்படுத்தக் கூடாது. தென் மாவட்ட மக்களை எல்லாம் அழித்து விடக்கூடிய திட்டம் என்றெல்லாம் நாங்கள் எத்தனையோ முறை சொன்ன பிறகும் எந்த கருத்தையும் உள் வாங்காமல் காங்கிரஸ் அரசு திட்டத்தை அமல்படுத்துவதில் குறியாக இருந்தது.

அதன் பிறகு வந்த நரேந்திரமோடி தலைமையிலான பாரதிய ஜனதா அரசு இந்த திட்டத்தை தொடர்ந்து நடைமுறைப்படுத்துவதில் முனைப்புடன் செயல்பட்டு கொண்டிருக்கிறது. மேலும் அதிகமான அணு உலைகளையும் கட்டிக் கொண்டிருக்கிறார்கள். தமிழக மக்களுக்காக எழுந்து நின்று குரல் கொடுக்க வேண்டிய தமிழக அரசு, டெல்லியை கண்டு அஞ்சுகிறது. தென்பகுதி மக்கள் மிகப்பெரிய அழிவு திட்டத்திற்குள் சிக்கி கொண்டிருக்கிறோம். இதுகுறித்து முழு விசாரணை நடத்தி வெள்ளை அறிக்கை வெளியிட வேண்டும்.

இவ்வாறு அவர் கூறினார்.