செய்திகள்

உளவாளி மீதான நச்சுப்பொருள் தாக்குதலில் ரஷியா மீது நடவடிக்கை - இங்கிலாந்துக்கு அமெரிக்கா முழு ஆதரவு

இங்கிலாந்து வாழ் ரஷிய உளவாளி நச்சுப்பொருள் தாக்குதலுக்கு ஆளானார். இதில் ரஷியா மீது இங்கிலாந்து எடுத்த நடவடிக்கைக்கு அமெரிக்கா முழு ஆதரவு தெரிவித்து உள்ளது.

மாலை மலர்

Published:16th Mar, 2018 at 12:37 AM

வாஷிங்டன்:

இங்கிலாந்து வாழ் ரஷிய உளவாளி நச்சுப்பொருள் தாக்குதலுக்கு ஆளானார். இதில் ரஷியா மீது இங்கிலாந்து எடுத்த நடவடிக்கைக்கு அமெரிக்கா முழு ஆதரவு தெரிவித்து உள்ளது.

ரஷிய நாட்டை சேர்ந்தவர், உளவாளி செர்கெய் ஸ்கிரிபால் (வயது 66). இவர் 1990-களில் அந்த நாட்டின் ராணுவ உளவு பிரிவில் பணியாற்றி வந்தார். அதே நேரத்தில் இங்கிலாந்து நாட்டின் உளவுப்பிரிவிலும் ரகசியமாக சேர்ந்து, அதற்காகவும் வேலை பார்த்தார்.

செர்கெய், ரஷிய உளவாளி என்ற நிலையில் தன் நாட்டைப்பற்றி கிடைக்கிற ரகசிய தகவல்களை அப்படியே இங்கிலாந்துக்கும் அளித்து வந்தார். ஒரு கட்டத்தில் ரஷிய நிர்வாகம் இதை மோப்பம் பிடித்தது. அதைத் தொடர்ந்து செர்கெய், கைது செய்யப்பட்டார். ராணுவ ரகசியங்களை கசிய விட்ட குற்றச்சாட்டின்பேரில், அவருக்கு 13 ஆண்டுகள் சிறைத்தண்டனை விதிக்கப்பட்டது.

ஆனால், உளவுக்கைதிகள் பரிமாற்ற உடன்படிக்கையின் கீழ், செர்கெய்க்கு ரஷியா பொது மன்னிப்பு வழங்கியது. அதைத் தொடர்ந்து அவர் இங்கிலாந்துக்கு அனுப்பப்பட்டார். அந்த நாடு அவருக்கு புகலிடம் அளித்தது.

அதைத் தொடர்ந்து செர்கெய், அங்கு வில்ட்ஷயர் மாகாணத்தில் தனது மகள் யுலியாவுடன் (33) வசித்து வந்தார்.

இந்த நிலையில், அவரும், அவரது மகள் யுலியாவும் அங்கு உள்ள பூங்கா ஒன்றில் கடந்த 4-ந் தேதி மயங்கிச்சரிந்த நிலையில் கண்டுபிடிக்கப்பட்டனர். அவர்கள் உடனடியாக மீட்கப்பட்டு அங்கு உள்ள ஆஸ்பத்திரியில் சேர்க்கப்பட்டனர். அவர்கள் மர்ம நச்சுப்பொருள் தாக்குதலுக்கு ஆளானதால், ஆபத்தான நிலையில் உள்ளதாக டாக்டர்கள் தெரிவித்தனர். இந்த தாக்குதலில் ஒரு போலீஸ்காரரும் பாதிக்கப்பட்டு உள்ளார்.