இரட்டை இலை சின்னம் யாருக்கு?: 6-ம் தேதி முதல் விசாரணை தொடக்கம்

இதைத் தொடர்ந்து எடப்பாடி பழனிசாமி அணியினர் பிரமாண பத்திரங்களை திரட்டும் பணியில் தீவிரம் காட்டினார்கள். அ.தி.மு.க. பொதுக்குழு, செயற்குழு உறுப்பினர்களில் 98 சதவீதம் பேரிடம் கடிதம் பெற்றனர். அதுபோல மாவட்ட செயலாளர்கள், தலைமைக் கழக நிர்வாகிகள் மற்றும் கிளைக் கழக நிர்வாகிகள் அனைவரிடமும் ஒப்புதல் கடிதம் பெறப்பட்டது.

கையெழுத்து பெறப்பட்டுள்ள இவர்கள் அனைவரும் கடந்த ஆண்டு டிசம்பர் மாதம் 5-ந்தேதி ஜெயலலிதா மரணம் அடைந்தபோது பொறுப்புகளில் இருந்தவர்கள். ஜெயலலிதாவால் நியமனம் செய்யப்பட்டவர்கள்.

இவர்கள் அனைவரும் தங்களது பிரமாண பத்திரத்தில், ஜெயலலிதா மரணம் அடைந்தது முதல் செப்டம்பர் 12-ந்தேதி பொதுக்குழு கூட்டம் நடந்தது வரை என்னென்ன நடந்தது என்பதை விளக்கமாக கூறியுள்ளனர். மேலும் பொதுக்குழுவில் கொண்டு வரப்பட்ட 12 தீர்மானத்தை ஏற்பதாகவும் கூறியுள்ளனர்.

ஜெயலலிதா நியமித்த நிர்வாகிகளே கட்சியை வழி நடத்துவதால் இரட்டை இலை சின்னத்தை ஒன்றுபட்ட அ.தி.மு.க.வுக்கு ஒதுக்க வேண்டும் என்றும் கூறி உள்ளனர். இந்த ஆவணங்கள் அனைத்தும் தேர்தல் கமி‌ஷனில் நாளை ஒப்படைக்கப்படும் என்று தெரிய வந்துள்ளது.

புதிய ஆவணங்களை தொகுத்து விட்டதால் எடப்பாடி பழனிசாமி அணியினர் மிகுந்த உற்சாகத்துடன் உள்ளனர்.

அதே சமயத்தில் டி.டி. வி.தினகரனால் இன்னமும் திட்டமிட்டபடி ஆவணங்களை திரட்ட இயலவில்லை. ஜெயலலிதாவால் நியமனம் செய்யப்பட்ட 2,300 பொதுக்குழு - செயற்குழு உறுப்பினர்களில் சுமார் 100 பேர்தான் அவருக்கு ஆதரவாக இருப்பதாக தெரிகிறது. இதனால் அதன் ஆதரவாளர்களை நியமித்து புதிய பொதுக்குழு - செயற்குழுவை உருவாக்கும் முயற்சிகளில் தினகரன் ஈடுபட்டுள்ளார்.

அதற்கு கூடுதல் நாட்கள் தேவைப்படும் என்பதால் நேற்று தினகரன் வக்கீல் ராஜா செந்தூர் பாண்டியன் 3 வார கால அவகாசம் கேட்டு தேர்தல் கமி‌ஷனில் மனு கொடுத்தார். தினகரனின் கோரிக்கையை தேர்தல் கமி‌ஷன் ஏற்குமா? என்பது விரைவில் தெரிந்து விடும்.

இரட்டை இலை சின்னம் யாருக்கு என்பதை அக்டோபர் 31-ந்தேதிக்குள் தேர்தல் கமி‌ஷன் முடிவு செய்து அறிவிக்க வேண்டும் என்று கோர்ட்டு உத்தரவிட்டுள்ளது. எனவே இதை கருத்தில் கொண்டு அக்டோபர் 6-ந்தேதி விசாரணையைத் தொடங்க தேர்தல் கமி‌ஷன் திட்டமிட்டுள்ளது.