பத்மதீர்த்த குளத்தை ராணி கவுரி லட்சுமிபாய், இளவரசர் ஆதித்யவர்மா பார்வையிட்ட போது எடுத்தபடம்.

செய்திகள்

பத்மநாபசாமி கோவில் குளத்தில் கல்மண்டபங்கள் இடிப்பு - திருவிதாங்கூர் ராணி கண்டனம்

பத்மநாபசாமி கோவில் குளத்தில் பழமையான கல் மண்டபங்கள் இடிக்கப்பட்டுள்ளது பக்தர்களை வேதனை அடைய செய்துள்ளது என்று திருவிதாங்கூர் ராணி கண்டனம் தெரிவித்துள்ளார்.

மாலை மலர்

Published:26th Feb, 2018 at 1:17 PM

திருவனந்தபுரம்:

திருவனந்தபுரத்தில் உள்ள பத்மநாபசாமி கோவில் மிகவும் பழமையும், பிரசித்தியும் பெற்றதாகும். இந்த கோவிலில் உள்ள ரகசிய நிலவறைகளில் இருந்து தங்கம், வைரம், வைடூரியம் அடங்கிய பொக்கி‌ஷம் கண்டு பிடிக்கப்பட்டதை தொடர்ந்து இந்த கோவிலுக்கு பலத்த பாதுகாப்பு ஏற்பாடுகள் செய்யப்பட்டுள்ளது.

இந்த கோவில் தற்போது சுப்ரீம்கோர்ட்டு உத்தரவுபடி தனி அதிகாரியின் கட்டுப்பாட்டில் உள்ளது. மேலும் கோவிலின் சீரமைப்பு பணிகளும் சுப்ரீம் கோர்ட்டு உத்தரவுபடி நடந்து வருகிறது. இந்த கோவிலின் கிழக்கு வாசல் முன்பகுதியில் பத்ம தீர்த்த குளம் உள்ளது.

இந்த குளத்தையும் தூர் வாரி சீரமைக்கும் பணி கடந்த சில மாதங்களுக்கு முன்பு தொடங்கி நடந்து வருகிறது. இந்த நிலையில் குளத்தின் உள்ளே வடக்கு பகுதியில் இருந்த மிகவும் பழமையான 2 கல்மண்டபங்கள் சீரமைப்பு பணியின் போது இடிக்கப்பட்டன.

இதனால் பக்தர்கள் அங்கு திரண்டு சீரமைப்பு பணிகளை தடுத்து நிறுத்தினார்கள். கல்மண்டபங்கள் இடிக்கப்பட்டதற்கு பக்தர்கள் வேதனை தெரிவித்துள்ளனர்.

பழமையான கல்மண்டபங்கள் இடிக்கப்பட்டதற்கு திருவிதாங்கூர் மன்னர் குடும்பத்தினரும் கண்டனம் தெரிவித்துள்ளனர். திருவிதாங்கூர் ராணி கவுரி லட்சுமிபாய், இளவரசர் ஆதித்யவர்மா மற்றும் மன்னர் குடும்பத்தை சேர்ந்தவர்கள் நேற்று பத்மதீர்த்த குளத்திற்கு சென்று கல் மண்டபங்கள் இடிக்கப்பட்ட இடங்களை பார்வையிட்டனர்.