சி.ஜே.பி-யின் நாடாளுமன்ற பேரணிக்கு அதிரடி தடை: ஜந்தர் மந்தரில் போலீஸ் குவிப்பு!

பேரணிக்காக முறையான எழுத்துப்பூர்வ அனுமதியும் கோரப்படவில்லை என போலீஸ் தரப்பில் கூறப்படுகிறது. ஆனால், தாங்கள் இதுகுறித்து ஏற்கனவே வாய்மொழியாக போலீசாருக்குத் தகவல் தெரிவித்துவிட்டதாக சி.ஜே.பி அமைப்பின் செய்தித் தொடர்பாளர் வைஷ்ணவி கௌர் தெரிவித்துள்ளார்.

சோனம் வாங்சுக் கட்டாய இடமாற்றம்:

கடந்த 21 நாட்களாக ஜந்தர் மந்தரில் தொடர் உண்ணாவிரதத்தில் இருந்த லடாக் ஆர்வலர் சோனம் வாங்சுக், நேற்று அதிகாலையில் டெல்லி உயர்நீதிமன்ற உத்தரவு மற்றும் மருத்துவ ஆலோசனையின் பேரில் காவல்துறையினரால் அங்கிருந்து வலுக்கட்டாயமாக அகற்றப்பட்டு சஃப்தர்ஜங் மருத்துவமனைக்கு மாற்றப்பட்டார்.

அவர் கடுமையான நீர்ச்சத்து குறைபாட்டால் பாதிக்கப்பட்டிருந்ததால் இந்த நடவடிக்கை எடுக்கப்பட்டதாக காவல்துறை கூறினாலும், இந்த சம்பவத்தின் போது போலீசாருக்கும் போராட்டக்காரர்களுக்கும் இடையே கடும் வாக்குவாதம் மற்றும் தள்ளுமுள்ளு ஏற்பட்டது.

போராட்டக்காரர்கள் மீது போலீசார் தடியடி நடத்தியதாகவும், சி.ஜே.பி செய்தித் தொடர்பாளர் அபிஜீத் திப்கே தற்காலிகமாக காவலில் வைக்கப்பட்டதாகவும் கூறப்படுகிறது. ஆனால், தடியடி மற்றும் மின்சாரத்தை துண்டித்ததாக கூறப்படும் குற்றச்சாட்டுகளை டெல்லி காவல்துறை திட்டவட்டமாக மறுத்துள்ளது.

பலப்படுத்தப்பட்ட பாதுகாப்பு:

தற்போது ஜந்தர் மந்தர் பகுதியில் பதற்றம் நிலவுவதால், 200-க்கும் மேற்பட்ட டெல்லி போலீசார் மற்றும் விரைவு அதிரடிப் படையினர் குவிக்கப்பட்டுள்ளனர். நாளை பேரணி நடத்த முயன்றால் கடும் நடவடிக்கை எடுக்கப்படும் என்றும், விதிகளை மீறி நாடாளுமன்றத்தை நோக்கி முன்னேற முயல்பவர்கள் கைது செய்யப்படுவார்கள் என்றும் டெல்லி காவல்துறை எச்சரித்துள்ளது.