ஆயிரம்விளக்கு - டி.எம்.எஸ். இடையே சுரங்கப்பாதை பணிகள் அடுத்த மாதம் முடியும்

அரசினர் தோட்டத்தில் இருந்து அண்ணாசாலை வரை சுரங்கம் தோண்டும் பணியில் 2 எந்திரங்கள் கடந்த சில வருடங்களுக்கு முன்பு ஈடுபடுத்தப்பட்டன. இதில் ஒரு சுரங்கம் தோண்டும் எந்திரம் கடந்த மாதம் (அக்டோபர்) ஏ.ஜி.- தேனாம்பேட்டை வரை சுரங்கம் தோண்டும் பணியை முடித்துள்ளது.

இதுகுறித்து மெட்ரோ ரெயில் அதிகாரிகள் கூறியதாவது:-

அண்ணாசாலையில் சுரங்கம் தோண்டும் பணியை விரைவாக முடிக்க தீவிர முயற்சி எடுத்து வருகிறோம். எவ்வளவு சீக்கிரம் முடிக்க முடியுமோ அந்த அளவிற்கு முயற்சி செய்கிறோம். ஆனால் இந்த பணி நிறைவடைய மேலும் ஒரு மாதம் நீடிக்கும் என்று தெரிகிறது.

அந்த பகுதியில் மண்ணின் தன்மை சற்று சவாலாக இருந்ததால் மிக கவனமாக பணிகளை மேற்கொள்ள வேண்டிய நிலை ஏற்பட்டது. மெட்ரோ ரெயில் திட்டம் 1-ல் இந்த பணி மட்டுமே நிலுவையில் உள்ளது.

45 கிலோ மீட்டர் மொத்த தூரத்தில் 24 கிலோ மீட்டர் சுரங்கப்பாதை முடிந்துள்ளது. இதேபோல விரிவாக்கம் செய்யப்பட்ட வண்ணாரப்பேட்டை- விம்கோநகர் சுரங்கப்பாதை பணியும் நிறைவடைந்துள்ளது.

ஏ.ஜி.ஆபீஸ்- டி.எம்.எஸ். பகுதியில் 2-வது சுரங்கம் தோண்டும் மெஷின் பணியை முடித்தவுடன் தண்டவாளம் அமைக்கும் பணி, கான்கிரீட் வேலை நடைபாதை போன்ற பணிகள் அமைக்கப்படும்.

இவ்வாறு அவர்கள் கூறினர்.