சிக்கிம் எல்லையில் பதற்றம்: சீனாவுக்கு பதிலடி கொடுக்க தயார் நிலையில் இந்திய ராணுவம்

இந்திய வீரர்களும், சீன வீரர்களும் அருகருகே நேருக்கு நேர் அணி வகுத்ததால், அந்த பகுதியில் கடும் பதட்டம் ஏற்பட்டது. ஒரு கட்டத்தில் போர் மூளும் அபாயமும் உருவானது. என்றாலும் அந்த பகுதியில் இருந்து இரு நாட்டு வீரர்களும் விலக்கப்படவில்லை.

சிக்கிம் எல்லை அருகே உள்ள சர்ச்சைக்குரிய அந்த முச்சந்தி பகுதியை நீண்ட நாட்களாக சீனா தனக்குரியது என்று சொந்தம் கொண்டாடி வருகிறது. தனது நிலப்பகுதியில் இருந்து இந்தியா ராணுவத்தை திரும்ப பெற வேண்டும் என்று தினமும் சீனா கூறியபடி உள்ளது. ஆனால் இந்தியா எதையும் கண்டுகொள்ளவில்லை.

சிக்கிம் மாநில எல்லை அருகே உள்ள நிலப்பரப்பின் ராணுவ முக்கியத்துவத்தை உணர்ந்துள்ள இந்தியா, அங்கிருந்து தனது ராணுவ வீரர்களை விலக்கக்கூடாது என்பதில் மிகவும் உறுதியாக உள்ளது. அதுபோல சீனாவும் அங்கிருந்து பின்வாங்கக் கூடாது என்ற முடிவில் இருக்கிறது. இந்தியா, சீனா இரு நாடுகளுமே அந்த சந்திப்பை கவுரவப் பிரச்சினை போல பார்க்கின்றன.

இந்த நிலையில் டோங் லாங் எல்லை பிரச்சினையில் இந்தியாவின் எந்த சமரசத்தையும் ஏற்க மாட்டோம் என்று நேற்று முன்தினம் சீனா அறிவித்தது. பிரச்சினை தொடங்கி ஒரு மாதமான பிறகும் சீனா இவ்வாறு அறிவித்துள்ளதால் அது எதற்கும் தயார் என்பது போல நடந்து கொள்கிறது.

சீனாவின் இத்தகைய நெருக்கடிகளுக்கு பதிலடி கொடுக்கும் நடவடிக்கையை கடந்த இரு தினங்களாக இந்திய ராணுவம் மேற்கொண்டுள்ளது. டோக்லாம் பகுதியில் உள்ள இந்திய ராணுவ வீரர்கள் அங்கு நிரந்தரமாக தங்கும் வகையில் கூடாரங்கள் அமைக்கப்பட்டுள்ளன.

இரவு-பகலாக 24 மணி நேரமும் டோக்லாம் பகுதியில் தங்கி இருப்பதற்கு வசதியாக அந்த கூடாரங்கள் கட்டப்பட்டுள்ளன. மேலும் அந்த கூடாரங்களில் உள்ள வீரர்களுக்கு இந்தியாவின் மற்ற பகுதிகளில் இருந்து உணவு மற்றும் ராணுவ தளவாடங்கள் எடுத்துச் செல்வதற்கான நேரடி இணைப்பு ஏற்படுத்தப்பட்டுள்ளது.

இவை தவிர டோக்லாம் பகுதியில் அமைக்கப்பட்டுள்ள கூடாரங்களில் இருந்து சீன வீரர்களின் ஒவ்வொரு அசைவையும் மிக, மிக எளிதாக கண்காணிக்கும் வசதியையும் இந்திய வீரர்கள் செய்துள்ளனர். இதன் மூலம் சீனாவின் எத்தகைய மிரட்டலுக்கும் பதிலடி கொடுக்கும் வகையில் இந்தியா தயாராக இருப்பது தெரியவந்துள்ளது.

சீனாவின் நெருக்கடி எந்த அளவில் வந்தாலும் எதிர்கொள்ள தயார் என்பதை சூசகமாக உணர்த்தும் வகையில் அந்த கூடாரங்கள் அமைந்துள்ளன. மேலும் எத்தனை நாட்கள் ஆனாலும் நீண்ட காலம் அங்கு தொடர்ந்து தங்கி இருக்கும் வகையில் ஏற்பாடுகள் செய்யப்பட்டுள்ளன.

இதற்கு முன்பு இந்தியா-சீனா இடையே இத்தகைய நெருக்கடி உருவானபோது தூதரக அளவில் பேசி சமரசம் செய்யப்பட்டன. இந்த தடவையும் அப்படி சமரச தீர்வு காண முயற்சிகள் நடந்து வருகின்றன.

ஆனால் சீனாவின் பிடிவாதம் காரணமாக இதுவரை சமரசம் ஏற்படவில்லை. இதைத் தொடர்ந்தே எதையும் எதிர்கொள்ள தயார் என்ற ரீதியில் இந்திய ராணுவம் கூடாரங்கள் அமைத்து நிரந்தரமாக தங்கும் பதிலடியை கையில் எடுத்துள்ளது.