திருச்செந்தூரை தொடர்ந்து ஷீரடி செல்லும் த.வெ.க. தலைவர் விஜய்

சென்னை:

தமிழ்நாடு சட்டமன்ற தேர்தல் கடந்த 23-ந்தேதி நடைபெற்று முடிந்துள்ளது. இந்த தேர்தலில் த.வெ.க. 233 தொகுதிகளிலும் தனித்தே களம் கண்டுள்ளது. அதில், கட்சியின் தலைவர் நடிகர் விஜய் சென்னை பெரம்பூர் மற்றும் திருச்சி கிழக்கு ஆகிய 2 தொகுதிகளில் போட்டியிட்டுள்ளார். இந்த தேர்தல் வாக்கு எண்ணிக்கையானது வருகிற மே 4-ந்தேதி நடைபெற உள்ளது.

இந்த நிலையில், சட்டமன்ற தேர்தலையொட்டி, அரசியல் கட்சித் தலைவர்கள் பம்பரமாக சுற்றிச் சுழன்று பிரசாரங்களை மேற்கொண்டதால் ஏற்பட்ட களைப்பை போக்க வெளிநாட்டு சுற்றுலாத் தலங்கள், உள்நாட்டு கோடைவாழ் தலங்களுக்கு சென்று ஓய்வு எடுத்து வருகின்றனர். ஆனால், த.வெ.க. தலைவர் நடிகர் விஜய் தனது முக்கியமான தருணங்களில் ஆன்மிக பயணங்களை மேற்கொள்வதை வழக்கமாக கொண்டுள்ளார்.

அந்த வகையில் வருகிற 4-ந் தேதி தேர்தல் வாக்கு எண்ணிக்கை நடைபெற உள்ள நிலையில், தமிழகத்தில் 233 தொகுதிகளிலும் தனித்து போட்டியிட்டுள்ள தனது கட்சி வேட்பாளர்கள் வெற்றிபெற வேண்டும், தாம் முதலமைச்சராக வேண்டும் என்ற வேண்டுதலுடன் திடீரென யாரும் எதிர்பாராத வகையில் நேற்று அதிகாலை திருச்செந்தூர் முருகன் கோவிலுக்கு சென்றார். அங்கு கடல் குளித்து முடித்துவிட்டு அதிகாலையில் நடைபெற்ற முருகப்பெருமானின் விஸ்வரூப தரிசனம் செய்தார். முன்னதாக கோவில் சார்பில் நடிகர் விஜய்க்கு பூரண கும்ப மரியாதை வழங்கப்பட்டது. அதே போன்று செந்தூர் முருகனின் நினைவாக அவருக்கு வேல் ஒன்றும் பரிசளிக்கப்பட்டது.