‘தூத்துக்குடி மாணவி வழக்கின் முழு விசாரணை விவரம் இதுதான்... குற்றவாளிக்கு உச்சபட்ச தண்டனை பெற்றுத் தரப்படும்’ - எஸ்.பி. மதன்

தூத்துக்குடி மாவட்டம், விளாத்திக்குளம் அருகே வேடநத்தம் கிராமத்தில் +2 மாணவி, பாலியல் வன்கொடுமை செய்யப்பட்டு கொல்லப்பட்ட சம்பவம் தமிழ்நாடு முழுவதும் பெரும் பரபரப்பை ஏற்படுத்தியது. இந்த வழக்கில் இன்று தர்ம முனீஸ்வரன் என்பவர் கைது செய்யப்பட்டுள்ளார்.

இந்நிலையில் இதுதொடர்பாக தூத்துக்குடி மாவட்ட காவல் கண்காணிப்பாளர் மதன் செய்தியாளர்களை சந்தித்தார். அப்போது வழக்கு விசாரணை எதன் அடிப்படையில் மேற்கொள்ளப்பட்டது உள்ளிட்ட விவரங்களை பகிர்ந்தார்.

“11.03.2026, சம்பவம் நடந்த அன்றே பத்து தனிப்படைகள் அமைக்கப்பட்டது. இந்த தனிப்படையில் 4 டிஎஸ்பி, 6 இன்ஸ்பெக்டர்ஸ் உட்பட 150 காவலர்கள் இருந்தனர். இவர்கள் இல்லாமல், தமிழ்நாட்டின் சட்டம், ஒழுங்கு ஏடிஜிபி, தெற்கு சரக ஐஜி ஆகியோர் மூன்று நாட்கள் தூத்துக்குடியில் தங்கி விசாரணைக்கு வழிகாட்டினர்.

திருநெல்வேலி சரக டிஐஜி சரவணன் சம்பவம் நடந்த நாளில் இருந்து தினமும் சம்பந்தப்பட்ட காவல்துறைக்கு சென்று விசாரணைக்கு ஆதரவாக இருந்தார்.