தமிழக சட்டசபை கூட்டத்தொடரில் பள்ளிக்கல்வித் துறை மானியக் கோரிக்கை மீதான விவாதத்தின் போது, அமைச்சர் ராஜ்மோகன் உறுப்பினர்களின் வினாக்களுக்கு பதிலளித்துப் பேசினார். அப்போது, மாநிலத்தின் கல்வி முறையை மேம்படுத்துவது மற்றும் மாணவர் நலனை முதன்மைப்படுத்துவது தொடர்பாகப் பல்வேறு புதிய திட்டங்களையும், நிர்வாகச் சீர்திருத்தங்களையும் அவர் விரிவாக அறிவித்தார்.
சட்டசபையில் வழக்கமாக உறுப்பினர்கள் அல்லது அமைச்சர்களின் முதல் உரையை 'கன்னிப் பேச்சு' என்று குறிப்பிடும் வழக்கம் இருந்து வருகிறது. இந்த மரபுசார்ந்த சொற்றொடருக்கு பதிலாக 'அறிமுக உரை' எனப் பயன்படுத்த வேண்டும் என்று பாமக சட்டமன்ற உறுப்பினர் காலையில் கோரிக்கை விடுத்திருந்தார். இக்கோரிக்கையை ஏற்றுக்கொண்ட அமைச்சர் ராஜ்மோகன், தமது உரையை 'அறிமுக உரை' எனக் கூறித் தொடங்கி, பேரவை விவாதத்தில் ஒரு புதிய மாற்றத்தை ஏற்படுத்தினார்.
மாணவர்களின் கற்றல் சுமையைக் குறைக்கவும், பாடங்களை ஆர்வத்துடன் அணுகவும் புதிய கற்பித்தல் முறைகள் அறிமுகப்படுத்தப்பட உள்ளன.
கடினமான பாடங்களை எளிமையாக்கும் வகையில் கதை வடிவிலான பாடத்திட்டம் உருவாக்கப்படும். குறிப்பாக, கணிதப் பாடங்கள் அனைத்தும் கதைகள் மற்றும் நடைமுறை எடுத்துக்காட்டுகள் வாயிலாகக் கற்பிக்க நடவடிக்கை எடுக்கப்படும்.
மாணவர்களின் கற்றல் திறனை ஒப்பிடுவதைத் தவிர்க்கும் வகையில், இனி எந்தவொரு மாணவரையும் 'சராசரி மாணவர்' எனக் குறிப்பிடக் கூடாது எனத் தெளிவுபடுத்தப்பட்டுள்ளது.
'TN3 அறிவுத்தளம்' உருவாக்கப்படுவதோடு, தமிழகத்தில் உள்ள 13,259 அரசு மற்றும் உதவிபெறும் பள்ளிகளில் 'தமிழ்ப்பேச்சு உயிர் மூச்சு' என்ற சிறப்புத் திட்டம் அறிமுகம் செய்யப்படும்.
பள்ளிகளில் மாணவர்களின் உடற்தகுதி மற்றும் விளையாட்டுத் திறனை ஊக்குவிக்கத் துறை ரீதியாக முக்கிய முடிவுகள் எடுக்கப்பட்டுள்ளன. பள்ளிக்கல்வித் துறையில் காலியாக உள்ள 2,771 உடற்பயிற்சி ஆசிரியர் பணியிடங்கள் உடனடியாக நிரப்பப்படும். ஆசிரியர்களுக்காக முக்கியமான தீர்மானம் நாளை கொண்டு வருவோம்.
தமிழகத்தில் உள்ள அரசு மற்றும் தனியார் உட்பட அனைத்துப் பள்ளிகளிலும் உடற்கல்விக்கான பாடவேளையை எக்காரணம் கொண்டும் ரத்து செய்யவோ அல்லது வேறு பாடங்களுக்குப் பயன்படுத்தவோ கூடாது என உத்தரவிடப்பட்டுள்ளது. நடுநிலைப் பள்ளிகளில் சதுரங்கம், சடுகுடு (கபடி) போன்ற பாரம்பரிய விளையாட்டு முறைகள் மீட்டெடுக்கப்பட்டு மேம்படுத்தப்படும். பள்ளி மாணவர்களுக்கு வழக்கம் போல் வழங்கப்படும் இலவச சீருடைகளுடன் சேர்த்து, சிறப்பு ஸ்போர்ட்ஸ் ஜெர்சியும் வழங்கப்படும்.
தவறுகள் செய்யும் மாணவர்களைக் குற்றவாளிகளாகப் பார்க்காமல், நல்வழிப்படுத்தும் கோணத்திலேயே அணுக வேண்டும் என்று முதலமைச்சர் அறிவுறுத்தியுள்ளதாக அமைச்சர் குறிப்பிட்டார். தற்போது வழங்கப்படும் சத்துணவுத் திட்டத்தில் அனைத்து ஊட்டச்சத்துகளும் உள்ள போதிலும், மாணவர்களின் உடல் வளர்ச்சியைக் கருத்தில் கொண்டு புரதச்சத்தை மேலும் அதிகரிக்கும் கோரிக்கை முதலமைச்சரின் பரிசீலனைக்கு அனுப்பப்பட்டுள்ளது. குறைந்த எண்ணிக்கையில் (10 மாணவர்கள் மட்டுமே) மாணவர்கள் இருந்தாலும் அப்பள்ளிகள் தொடர்ந்து செயல்படும். தனியார் பள்ளிகள் விதிகளை மீறி அதிக கட்டணம் வசூலித்தால் கடுமையான நடவடிக்கை எடுக்கப்படும்.
அரசு கல்வி நிறுவனங்களின் உள்கட்டமைப்பை சர்வதேசத் தரத்திற்கு உயர்த்த பெருந்தலைவர் காமராசர் கல்லூரி மேம்பாட்டுத் திட்டம் செயல்படுத்தப்படும். மேலும், நகர்ப்புற மற்றும் மாநகராட்சி சார்ந்த ஒப்பந்தங்களில் முழுமையான வெளிப்படைத்தன்மை உறுதி செய்யப்படும். நாகப்பட்டினம் மாவட்ட மக்களின் நீண்ட நாள் கோரிக்கையை ஏற்று, வரும் செப்டம்பர் 15 முதல் பயனாளிகளுக்குக் கூட்டுக் குடிநீர் விநியோகம் முறைப்படி தொடங்கப்படும் எனவும் அமைச்சர் ராஜ்மோகன் உறுதியளித்தார்.