வாக்களிக்காமல் இருப்பதும் ஒருவித தேச துரோக குற்றம்தான் - சீமான் பேட்டி

தேர்தலில் போட்டியிடுகிற வேட்பாளர்கள் மீது நம்பிக்கை இல்லையா? அல்லது இந்த நாட்டில் இருக்கிற ஜனநாயக அமைப்பின் மீது நம்பிக்கை இல்லையா என்கிற கேள்வி வருகிறது. தேர்தல் ஆணையம் 100 விழுக்காடு வாக்கு செலுத்த வேண்டும் என்று சொல்லுகிறது. நான் என்ன நினைக்கிறேன் என்றால் குண்டு வைப்பது, கொலை செய்வது, வருமான வரி கட்டாமல் ஏய்ப்பது, அளவுக்கு அதிகமாக சொத்து சேர்த்து கணக்கில் காட்டாமல் மறைப்பது ஆகியவைதான் குற்றம், தேச துரோகம் என்பது இல்லை. வாக்கு செலுத்தாமல் இருப்பதும் ஒருவித தேச துரோக குற்றம்தான். ஜனநாயக துரோகம்தான். அதை என் மக்கள், என் சொந்தங்கள் செய்யக் கூடாது.

கற்றவர்கள்தான் மற்றவர்களுக்கு வழிகாட்ட வேண்டும். எல்லோரும் நாம் ஒரு வாக்கு செலுத்தி என்ன மாற்றம் வந்துவிடப் போகிறது என்று நினைக்கிறார்கள். அப்படி இல்லை. ஒவ்வொரு வாக்கிலும்தான் மாற்றம் வரும். அதனால் என்னில் இருப்பது தான் மாற்றம், உங்களில் இருப்பது தான் மாற்றம்.