பூந்தமல்லி-வடபழனி இடையே புதிய மெட்ரோ ரெயில் சேவை 900 பயணிகளை ஒரே நேரத்தில் ஏற்றுக்கொள்ளும் திறனுடன், 10 நிமிட இடைவெளியில் இயக்கப்பட உள்ளது. தானியங்கி தொழில்நுட்பம் மற்றும் பாதுகாப்பு சிஸ்டம் கொண்ட இந்த சேவை, பொதுமக்களின் பயண வசதியை மேம்படுத்தும் என எதிர்பார்க்கப்படுகிறது.
மெட்ரோ ரெயில் 2-ம் கட்ட திட்டம் 5 வழித்தடத்தில் செயல்படுத்தப்படுகிறது. இதில் 3-வது வழித்தடம் பூந்தமல்லி- கலங்கரை விளக்கம் இடையே இயக்கப்படவுள்ளது. இந்த வழித்தடம் உயர்மட்ட பாதையாகவும் சுரங்கப்பாதையாகவும் அமைந்துள்ளது.
முதல் கட்டமாக பூந்தமல்லியில் இருந்து வடபழனி வரை பணிகள் முடிக்கப்பட்டு சேவைக்கு தயாரானது. கடந்த 6 மாத தாமதத்திற்குப் பிறகு வருகிற 11-ந்தேதி (ஞாயிற்றுக்கிழமை) பிரதமர் நரேந்திர மோடி புதிய சேவையை தொடங்கி வைத்து பயணம் செய்கிறார். இந்த விழாவில் அவருடன் முதலமைச்சர் விஜய் பங்கேற்கிறார்.
மெட்ரோ ரெயில் 2-வது கட்ட பணியில் முதல் சேவை பூந்தமல்லியில் இருந்து வடபழனி வரை தொடங்க இருப்பதால் பொதுமக்கள் மத்தியில் மிகுந்த எதிர்பார்ப்பு ஏற்பட்டுள்ளது.
இந்த வழித்தடத்தில் மெட்ரோ ரெயில் சேவை குறித்து திட்ட இயக்குனர் அர்ச்சுனன் கூறியதாவது:-
பூந்தமல்லி-வடபழனி வழித்தடத்தில் 15 ரெயில்கள் இயக்கப்படும். ஒவ்வொரு மெட்ரோ ரெயிலும் மூன்று பெட்டிகளைக் கொண்டதாகும். தொடக்கத்தில் பயணிகளின் தேவைக்கு இது போதுமானதாக இருக்கும் என்று கருதுகிறோம்.
ஒருவேளை தேவை அதிகரித்தால் கூடுதலாக மெட்ரோ ரெயில் இயக்க தயாராக உள்ளோம். மொத்தம் 36 ரெயில்கள் கொள்முதல் செய்யப்பட்டு வைக்கப்பட்டு இருப்பதிலிருந்து முதல் கட்டமாக 15 ரெயில்கள் மட்டும் இயக்கப்படுகிறது.
2-வது கட்டத்தில் இயக்கப்படும் மெட்ரோ ரெயில்கள் அனைத்தும் டிரைவர் இல்லாமல் தானாக இயங்கக் கூடிய வகையில் நவீன தொழில் நுட்பத்தில் வடிவமைக்கப்பட்டுள்ளது. திட்ட ஆரம்ப கட்டத்தில் டிரைவருடன் மெட்ரோ ரெயில்கள் டிரைவருடன் இயக்கப்படும். பின்னர் டிரைவர் இல்லாமல் தானியங்கி சிஸ்டத்தில் செயல்படும்.
புதிய சேவையை தொடங்கும் இந்த வழித்தடத்தில் ஒரு மெட்ரோ ரெயிலில் அதிகபட்சமாக 900 பேர் பயணம் செய்ய முடியும். ஆரம்பத்தில் பத்து நிமிட இடைவெளியில் மெட்ரோ ரெயில்கள் இயக்கப்படும். பயணிகள் கூட்டம் அதிகரிக்கும் பட்சத்தில் இந்த இடைவெளி குறைக்கப்பட்டு சேவை அதிகரிக்கப்படும்.
தற்போது நடைமுறையில் உள்ள மெட்ரோ ரெயில் சேவைக்கும் புதிதாக இயக்கப்படவுள்ள மெட்ரோ ரெயில் சேவைக்கும் வித்தியாசம் உள்ளது. தானியங்கி ரெயில் கட்டுப்பாடு மற்றும் தானியங்கி ரெயில் பாதுகாப்பு சிஸ்டம் புதிய மெட்ரோ ரெயில்களில் உள்ளன.
மேலும் நவீன தகவல் தொழில்நுட்ப அடிப்படையில் கட்டுப்பாடு அமைப்புகள் உள்ளன. சிக்னல் சிஸ்டம் நவீன தொழில்நுட்பத்தில் கையாளப்படுகிறது.
புதிய மெட்ரோ ரெயில் சேவை பொதுமக்கள் பயன்பாட்டிற்கு எப்போது இருந்து கொண்டு வரப்படும் என்பது திறப்பு விழாவுக்கு முன்னதாக முடிவு செய்யப்படும்.
இவ்வாறு அவர் கூறினார்.