போதை ஒழிப்பில் சிறப்பாக செயல்பட்ட 15 காவல் அதிகாரிகளுக்கு முதலமைச்சரின் பதக்கம் அறிவிப்பு

பதக்கம் பெறுபவர்களின் சிறப்பு பணிகள் வருமாறு:-

போலீஸ் சூப்பிரண்டு விவேகானந்த சுக்லா, ராணிப்பேட்டை மற்றும் திருவள்ளூர் மாவட்டங்களில் காவல் கண்காணிப்பாளராக பணியாற்றிய காலத்தில், போதைப்பொருள் கும்பல்களை ஒழிப்பதில் சிறப்பாக செயல்பட்டு உள்ளார். இவரது வழிகாட்டுதலின்படி, மேற்கொள்ளப்பட்ட நுண்ணறிவு சார்ந்த நடவடிக்கைகள் மூலம், 903 கிலோ கஞ்சா, 575 கிராம் மெத்தாம்பெட்டமைன், 74.5 கிராம் எம்.டி.எம்.ஏ., 55 கிராம் கோகைன் மற்றும் எல்.எஸ்.டி. தாள்கள் பறிமுதல் செய்யப்பட்டு, வெளிமாநில மற்றும் அயல்நாட்டை சேர்ந்த குற்றவாளி கள் உட்பட 82 பேர் கைது செய்யப்பட்டனர்.

பொதுமக்கள் பாதுகாப்பிற்கும் போதைப்பொருள் தொடர்பான குற்றங்களை கட்டுப்படுத்துவதிலும் குறிப்பிடத்தக்க பங்களிப்பை வழங்கி உள்ளார்.

ராமநாதபுரம் மாவட்ட காவல் கண்காணிப்பாளர் ஜி.சந்தீஷ் தான் பணியாற்றிய மாவட்டங்களில் போதைப்பொருள் குற்றங்களை கணிசமாகக் குறைத்து உள்ளார். 2024-ஆம் ஆண்டு முதல் 347 வழக்குகள் பதிவு செய்யப்பட்டு, 640 குற்றவாளிகள் கைது செய்யப்பட்டனர். 2025-ம் ஆண்டில், 542 கிலோ கஞ்சா பறிமுதல் செய்யப்பட்ட சம்பவம், தமிழ்நாட்டில் நடைபெற்ற மிகப்பெரிய கஞ்சா பறிமுதல் நடவடிக்கையாகும்.

கூடுதல் காவல் கண்காணிப்பாளர் லட்சுமணன் போதைப்பொருள் நுண்ணறிவு பிரிவில் சிறப்பாக செயல்பட்டு வருகிறார். இவர், போதைப்பொருள் கடத்தல் கும்பல்களை ஒழிப்பதில் முக்கிய பங்காற்றியுள்ளார்.

வை. மனோஜ்குமார் சென்னை பெருநகர நுண்ணறிவுப் பிரிவு காவல் உதவி ஆணையராக போதைப்பொருள் குற்றங்களை ஒழிப்பதில் சிறப்பான சேவையாற்றி வருகிறார். இவரது முயற்சியால், 574 போதைப்பொருள் குற்றவாளிகள் கைது செய்யப்பட்டதுடன், பிற மாநிலங்களைச் சேர்ந்த கடத்தல்காரர்களும் சட்டத்தின் முன் நிறுத்தப்பட்டனர்.