குமரியில் கனமழை நீடிப்பு - திற்பரப்பு அருவியில் குளிக்க தடை

ஒரே நாளில் பேச்சிப்பாறை அணையின் நீர்மட்டம் 2 அடி உயர்ந்து, இன்று காலை நிலவரப்படி 35.05 அடியாக உள்ளது. அணைக்கு வினாடிக்கு 2,406 கன அடி தண்ணீர் வந்து கொண்டிருக்கிறது. அணையில் இருந்து 490 கன அடி தண்ணீர் உபரியாக வெளியேற்றப்படுகிறது.பெருஞ்சாணி அணையின் நீர்மட்டம் ஒரே நாளில் 3 அடி உயர்ந்து, தற்போது 61.85 அடியாக உள்ளது. அணைக்கு வினாடிக்கு 2,770 கன அடி தண்ணீர் வந்து கொண்டிருக்கிறது.

நாகர்கோவில் நகர மக்களின் குடிநீர் ஆதாரமான முக்கடல் அணையின் நீர்மட்டம் ஒரே நாளில் 3 அடி உயர்ந்து, தற்போது 4.90 அடியாக உள்ளது. மாம்பழத்துறையாறு அணையின் நீர்மட்டம் 29.30 அடியாக உயர்ந்துள்ளது. தொடர் மழையின் காரணமாக வள்ளியாறு, பரளியாறு, பழையாறு ஆகிய ஆறுகளில் வெள்ளம் கரைபுரண்டு ஓடுகிறது. இதனால் பாசன குளங்களும் வேகமாக நிரம்பி வருகின்றன. ஆறுகளில் வெள்ளப்பெருக்கு ஏற்பட்டுள்ளதால், பொதுமக்கள் யாரும் ஆற்றின் கரையோர பகுதிகளுக்கு செல்ல வேண்டாம் என்று மாவட்ட நிர்வாகம் சார்பில் எச்சரிக்கை விடுக்கப்பட்டுள்ளது.​

காளிகேசம் பகுதியிலும் ஆற்றில் தண்ணீர் பெருக்கெடுத்து ஓடுகிறது. கீரிப்பாறை, குலசேகரம், தடிக்காரன்கோணம் ஆகிய பகுதிகளில் உள்ள ரப்பர் தோட்டங்களில் மழைநீர் தேங்கியுள்ளதால் ரப்பர் பால் உற்பத்தி முற்றிலும் பாதிக்கப்பட்டுள்ளது. இதனால் ரப்பர் தோட்ட தொழிலாளர்கள் வேலையின்றி தவித்து வருகிறார்கள்.