கடும் வெயிலால் பொதுமக்கள் தவிப்பு: சென்னையில் மேலும் 2 நாட்கள் வெப்ப அலை நீடிக்கும்

தமிழ்நாட்டில் கோடை வெயிலின் உச்சம் தொடர்ந்து அதிகரித்து வருகிறது. அக்னி நட்சத்திரம் எனும் கத்தரி வெயில் மே 4-ல் தொடங்கிய பிறகு அதன் தாக்கம் அதிகம் காணப்படுகிறது. இது 28-ந்தேதி முடிவடைய உள்ள நிலையில் பல மாவட்டங்களில் வெயில் அதிகம் சுட்டெரிக்கிறது. இதனால் பகல் நேரங்களில் மக்கள் வெளியில் செல்வதை தவிர்த்து வந்தனர்.

அதிலும் கடந்த 1 வாரமாக சென்னை, வேலூர், திருச்சி, சேலம், தர்மபுரி, கரூர் உள்ளிட்ட பல மாவட்டங்களில் வெயிலின் உக்கிரம் அதிகமாக இருந்ததால் அனல் காற்று வீசியது.

ஆனால் வழக்கத்துக்கு மாறாக சென்னையில் நேற்று காலையில் கரு மேகங்கள் சூழ்ந்து பலத்த காற்று வீசியது. ஒரு சில இடங்களில் சாரல் மழை பெய்தது. கோடை காலத்தில் சென்னையில் ஏற்பட்ட காலமாற்றத்தால் வங்க கடலில் இருந்து ஈரப்பதம் கொண்ட வடகிழக்கு கடல் காற்று வீசியதால் நேற்று வெப்பம் தணிந்து இருந்தது.