நீலகிரி மாவட்டம் ஊட்டி மற்றும் அதன் சுற்றுவட்டார பகுதிகளில் உறைபனி தாக்கம் தொடர்கிறது. நாளுக்கு நாள் உறைபனி அதிகரித்து வருவதால் புல்வெளிகள், வனப்பகுதிகள் வேகமாக கருகி வருகின்றன. குறிப்பாக ஊட்டி, மஞ்சூர் பகுதிகளில் தேயிலை செடிகள் கருக தொடங்கி உள்ளது.
தொடர் உறைபனி காரணமாக லவ்டேல், வேலிவியூ, கேத்தி பாலாடா, சோலூர் உள்ளிட்ட பகுதிகளில் தேயிலை தோட்டங்கள் பசுமையை இழந்து வருகிறது. பச்சை, பசேல் என காட்சி அளித்த அவை நிறம் மாறி கருகி வருகின்றன. இந்த ஆண்டு உறைபனி காலதாமதமாக தொடங்கினாலும், அதன் தாக்கம் அதிகரித்து உள்ளது. இதனால் பச்சை தேயிலை மகசூல் வெகுவாக குறைந்து இருக்கிறது.
எனினும் உறைபனியால் கருகாமல் இருக்க தேயிலை செடிகளை பாதுகாக்கும் பணியில் ஈடுபட்டு வருகின்றனர். பகல், இரவு நேரங்களில் தேயிலை செடிகள் மீது மற்ற செடிகளை போட்டு மூடி முன்னேற்பாடுகளை செய்கிறார்கள்.
இதன் மூலம் நிழல் கிடைப்பதாலும், செடிகள் பனி விழாததாலும் அவை கருதுவது தவிர்க்கப்படுகிறது. சிலர் காலை, மாலை நேரங்களில் தண்ணீர் பாய்ச்சி வருகின்றனர். அதிகாலையில் கேரட், பீட்ரூட், பூண்டு போன்ற காய்கறி பயிர்கள் மீது உறைபனி படர்ந்து கிடக்கிறது. வெயில் வந்த பின்னர் உறைபனி கரைந்து விடுகிறது.