புத்தாண்டு தினத்தை நம்பிக்கையோடு வரவேற்ற மக்கள்- தேவாலயங்களில் சிறப்பு பிரார்த்தனை

அதிகமானோர் பங்கேற்கும் ஆலயங்களில் போலீஸ் பாதுகாப்பு போடப்பட்டிருந்தது. குறைந்த மக்கள் கூடும் தேவாலயங்களில் நள்ளிரவு பிரார்த்தனை நடந்தது. என்றாலும், அமைதியான முறையில் அனைவரும் வந்து சென்றனர்.

தென் இந்திய திருச்சபை சார்பில் ஜெமினி மேம்பாலம் அருகில் உள்ள கதீட்ரல் ஆலயத்தில் தென் இந்திய திருச்சபை சென்னை பி‌ஷப் ஜார்ஜ் ஸ்டீபன் தலைமையில் புத்தாண்டு சிறப்பு வழிபாடு நடந்தது. இதில் உலகம் செழிக்கவும், கொரோனா தொற்று அகலவும் வேண்டுதல் செய்யப்பட்டது. இங்கு நடந்த வழிபாட்டிலுல் கொரோனா கட்டுப்பாடுகளை கடைபிடித்து கிறிஸ்தவர்கள் பங்கேற்றனர்.

இது போல் அண்ணாநகர், அடையாறு, தாம்பரம், பெரம்பூர், மாதவரம், மூலக்கடை, கொடுங்கையூர் உள்ளிட்ட பகுதிகளில் உள்ள தென் இந்திய திருச்சபை ஆலயங்களிலும் புத்தாண்டு சிறப்பு வழிபாடு நடந்தது. சிறிய ஆலயங்களில் நள்ளிரவு பிரார்த்தனையும், பெரிய ஆலயங்களில் அதிகாலையும் வழிபாடுகள் நடந்தன.

இ.சி.ஐ. திருச்சபை சார்பில் நடந்த புத்தாண்டு சிறப்பு வழிபாட்டில் பேராயர் எஸ்றா சற்குணம் பங்கேற்றார். இதுபோல் லூத்தரன், பெந்தேகோஸ்து, ஆங்கலிக்கன், மெத்தடிஸ்ட் உள்ளிட்ட பல்வேறு கிறிஸ்தவ சபைகள் சார்பிலும் புத்தாண்டு சிறப்பு வழிபாடுகள் நடந்தன.

கிறிஸ்தவர்கள் பங்கேற்ற அனைத்து வழிபாடுகளும் நம்பிக்கையுடன் புத்தாண்டை வரவேற்கும் விதமாக அமைந்து இருந்தது. சென்னை தவிர தமிழ்நாட்டின் பிரபல ஆலயமான நாகை மாவட்டத்தில் உள்ள வேளாங்கண்ணி ஆலயத்தில் அதன் அதிபர் பிரபாகர் தலைமையில் சிறப்பு வழிபாடு நடந்தது. கோவை, மதுரை, தூத்துக்குடி, நெல்லை உள்பட அனைத்து மாவட்டங்களிலும் கிறிஸ்தவ ஆலயங்களில் புத்தாண்டு சிறப்பு வழிபாடுகள் உற்சாகத்துடன் நடந்தன. இதில் அனைவரும் மகிழ்ச்சியுடன் பங்கேற்று வழிபட்டனர்.