ஆன்லைன் மூலமாக திருக்குறள் பயிலும் ஆஸ்திரேலியா வாழ் தமிழர்களின் குழந்தைகள்

கடந்த ஆண்டு டிசம்பர் மாதம் தொடங்கிய இந்த திருக்குறள் வகுப்பு தற்போது வரை தொடர்ந்து நடைபெற்று வருகிறது. இதுநாள் வரை 34 அதிகாரங்கள் மூலம் 340 திருக்குறள்களை ஆஸ்திரேலியா வாழ் தமிழர்களின் குழந்தைகள் கற்றுள்ளனர். இந்த திருக்குறள் வகுப்பில் தாங்கள் பயின்ற திருக்குறளை சிறுமிகள் பிழையின்றி ஒப்புவிக்கின்றனர். மேலும் சிலர் தங்களது வீடுகளில் பலகையில் திருக்குறளை எழுதி விழிப்புணர்வும் ஏற்படுத்துகின்றனர்.

இது குறித்து தேவஸ்ரீ கூறும்போது, திருக்குறளை உலகம் முழுவதும் கொண்டு செல்லும் வகையில் ஆஸ்திரேலியா குழந்தைகளுக்கு கற்று கொடுத்து வருகிறேன். வாரத்திற்கு ஒரு அதிகாரம் வரை கற்று கொடுப்பது மகிழ்ச்சி அளிக்கிறது. அந்த திருக்குறளை அவர்கள் ஒப்புவிக்கும்போது இரட்டிப்பு மகிழ்ச்சியாக இருக்கிறது. இதேபோல் நிறைய நாடுகளுக்கு இந்த திருக்குறளை கொண்டு செல்ல வேண்டும் என்பது எனது கனவு என்றார்.

ஆஸ்திரேலியா வாழ் தமிழர்கள் கூறும்போது, திருக்குறளை எங்களது குழந்தைகள் ஆர்வத்துடன் கற்று வருகின்றனர். எங்களுக்கு தமிழ் மேல் பற்று அதிகமாக உள்ளது. அதே தமிழ் பற்று எங்களது குழந்தைகளுக்கும் வர வேண்டும் என்பதற்காக திருக்குறளை கற்க ஆர்வம் ஊட்டி வருகிறோம். திருக்குறளை கற்பதன் மூலம் அவர்களுக்கு தமிழ் மீது ஒருவித பற்று தானாகவே வந்துவிடும். குழந்தைகளும் ஈடுபாட்டுடன் கற்று வருகின்றனர் என்றனர்.