டெங்கு ஒழிப்பு நடவடிக்கையில் மெத்தனப்போக்கு: மாநகராட்சியை கண்டித்து பாடை கட்டி நூதன போராட்டம்

தமிழகத்தில் டெங்கு காய்ச்சலால் தினந்தோறும் உயிரிழப்புகள் ஏற்படுவது தொடர் கதையாகி வருகிறது. ஆனால் டெங்குவை கட்டுப்படுத்துகிறோம், தீவிர நடவடிக்கை மேற்கொள்கிறோம் என்று சுகாதாரத்துறை பொய் பிரசாரம் மேற்கொண்டு வருகிறது.

சென்னையில் சுகாதாரம் சீரழிந்து இருக்கிறது. துப்புரவு-சுகாதார பணியாளர்கள் தங்கள் பணிகளை முறையாக செய்வது இல்லை. இந்த சமயத்தில் கூட மாநகராட்சி நிர்வாகம் மெத்தன போக்கை கடைபிடிப்பதை வன்மையாக கண்டிக்கிறோம். பெயருக்கு ஆங்காங்கே பணிகள் நடக்கின்றன. அப்படி நடக்கும் பணிகளும் மோசமாகத்தான் இருக்கின்றன. குப்பைகளும், கொசுக்களும் ஒழிந்தபாடில்லை. நோய் தாக்கமும் குறைந்தபாடில்லை.

டெங்கு காய்ச்சல் பலி எண்ணிக்கையை எப்படி குறைக்கலாம்? என்பதிலேயே அரசின் ஒட்டுமொத்த கவனமும் இருக்கிறது. உயிரிழப்பவர்களை கூட மர்ம காய்ச்சல் எண்ணிக்கையில் சேர்த்து விடுகிறார்கள். மாநிலத்தின் தலைநகரிலேயே இப்படி என்றால், பிற மாவட்டங்களில் நிலைமை எப்படி இருக்கும்? எனவே தான் ஒன்றுக்கும் உதவாத இந்த மாநகராட்சியை கொலை செய்து பாடையில் ஏற்றியிருக்கிறோம். இனியாவது மக்கள் நலனில் மாநகராட்சி அக்கறை எடுத்து, உரிய நடவடிக்கைகளில் பணியாளர்களை உடனே ஈடுபடுத்தவேண்டும். அதை வலியுறுத்தியே இந்த போராட்டத்தை மேற்கொள்கிறோம்.

இவ்வாறு அவர்கள் கூறினார்கள்.