போரூர்:
சென்னை கே.கே. நகரில் இருந்து அண்ணா சதுக்கத்துக்கு நேற்று மாலை எண். 12-ஜி மாநகர பஸ் சென்று கொண்டிருந்தது. பஸ்சை டிரைவர் மனோகரன் ஓட்டினார்.
கே.கே. நகர் காமராஜர் சாலையில் பஸ் வந்தபோது படிக்கட்டில் மாணவர்கள் 2 பேர் நின்று கொண்டு வந்தனர். அவர்களை டிரைவர் மனோகரன் கண்டித்தார்.
இதனால் ஆத்திரம் அடைந்த மாணவர்கள் தனது நண்பர்கள் 2 பேரை போன் செய்து அங்கு வரவழைத்தனர்.
மோட்டார் சைக்கிளில் வந்த 2 வாலிபர்களும் மாணவர்களுடன் சேர்ந்து டிரைவர் மனோகரனை சரமாரியாக தாக்கிவிட்டு தப்பி ஓடிவிட்டனர்.
இதுபற்றி அறிந்ததும் மற்ற பஸ் டிரைவர்கள் கே.கே. நகர் டெப்போவில் போராட்டத்தில் ஈடுபட்டனர்.
தாக்குதலில் ஈடுபட்டவர்கள் விட்டுச்சென்ற மோட்டார் சைக்கிளை போலீசார் பறிமுதல் செய்து அதனை வைத்து 4 பேரை பிடித்தனர். அவர்கள் அனைவரும் கே.கே. நகர் பகுதியை சேர்ந்தவர்கள்.
இதில் 3 பேர் தி.நகரில் உள்ள பள்ளியில் படிக்கும் பிளஸ்-2 மாணவர்கள் ஆவர். மாணவர்களின் பெற்றோர்களை போலீசார் வரவழைத்து பஸ் டிரைவர்கள் முன்னிலையில் சமாதான பேச்சுவார்த்தை நடத்தினர்.
இதைத் தொடர்ந்த மாணவர்களிடம் பெற்றோர்களிடம் எழுதி வாங்கிக் கொண்டு மாணவர்களை எச்சரித்து போலீசார் அனுப்பி வைத்தனர்.