சிலை கடத்தல் வழக்கில் டி.எஸ்.பி. காதர்பாஷா சிக்கினார்?

மதுரை தெற்கு வீதியில் கேமரா பழுது பார்க்கும் கடை வைத்துள்ள சுந்தர மூர்த்தி என்பவர் ஏராளமான ஐம்பொன் சிலைகளை படம் பிடித்து வைத்திருப்பதாகவும், அவைகளை அவர் சட்டவிரோதமாக விற்பனை செய்ய முயற்சிப்பதாகவும் சிலை கடத்தல் தடுப்பு பிரிவு போலீசுக்கு கடந்த 2008-ம் ஆண்டில் தகவல் கிடைத்தது.

இதனையடுத்து சிலை கடத்தல் தடுப்பு பிரிவு இன்ஸ்பெக்டராக பணியாற்றிய காதர்பாஷா, போலீஸ்காரர் சுப்புராஜ் ஆகியோர் விரைந்து சென்று இதுபற்றி விசாரணை நடத்தினர். அப்போது அருப்புக்கோட்டையை சேர்ந்த ஆரோக்கியராஜ் என்பவரின் நிலத்தை தோண்டிய போது 2 சிலைகள் கிடைத்தது தெரியவந்தது.

அதில் சிவனும் பார்வதியும் ஒன்றாக இருப்பது போன்ற ஒரு சிலையாகும். இன்னொன்று சிவகாமி சிலை இந்த சிலைகளை பறிமுதல் செய்த இன்ஸ்பெக்டர் காதர்பாஷா, போலீஸ்காரர் சுப்புராஜ் ஆகியோர், அது தொடர்பாக வழக்கு பதிவு செய்யவில்லை.

அதற்கு மாறாக சிலைகளை பதுக்கி, சிலை கடத்தல் கும்பலை போல செயல்பட்டுள்ளனர். சிலை கடத்தல் மன்னன் சுபாஷ் கபூரின் கூட்டாளியான தீனதயாளனரிடமே இந்த சிலைகளை இன்ஸ்பெக்டரும், போலீசாரும் விலை பேசி விற்பனை செய்துள்ளனர்.

பின்னர் இருவரும் அங்கிருந்து இடம் மாறி சென்றுவிட்டனர். போலீஸ்காரர் சுப்புராஜ் பதவி உயர்வு பெற்று கோயம்பேடு சப்-இன்ஸ்பெக்டராகி விட்டார். இன்ஸ்பெக்டர் காதர்பாஷா டி.எஸ்.பி.யாகி விட்டார். தற்போது திருவள்ளூர் மாவட்ட குற்றப்பிரிவில் அவர் பணிபுரிந்து வருகிறது. சிலை கடத்தலில் இவர்களுடன் மேலும் ஒரு போலீஸ்காரரும் ஈடுபட்டுள்ளார்.

இதுபற்றி தெரியவந்ததும் சிலை கடத்தல் தடுப்பு பிரிவிலேயே 3 பேர் மீதும் வழக்கு பதிவு செய்யப்பட்டது. இதில் சப்-இன்ஸ்பெக்டர் சுப்புராஜ் தற்போது அதிரடியாக கைது செய்யப்பட்டுள்ளார். பின்னர் ஸ்ரீவில்லிபுத்தூர் கோர்ட்டில் ஆஜர்படுத்தப்பட்ட சுப்புராஜ் சிறையில் அடைக்கப்பட்டார். டி.எஸ்.பி. காதர்பாஷாவையும் கைது செய்ய நடவடிக்கை எடுக்கப்பட்டுள்ளது.

அருப்புக்கோட்டையில் ஆரோக்கியராஜிடம் இருந்து பறிமுதல் செய்யப்பட்ட சாமி சிலைகளை சுபாஷ் கபூரின் கூட்டாளியான தீனதயாளனிடம் விற்பனை செய்வதற்காக போலீசார் பேரம் பேசினர். சிலைகளை வாங்கி பார்த்த தீனதயாளன் சேதம் அடைந்திருப்பதாக கூறி வாங்க மறுத்தார். இதனை தொடர்ந்து அவரை மிரட்டி பணிய வைத்துள்ளனர். இந்த சிலைகளை வாங்கிக் கொண்டு அதற்கு உரிய விலையை தர வேண்டும் என்று வற்புறுத்தி உள்ளனர்.

இதனால் பயந்து போன தீனதயாளன் ரூ.25 லட்சத்துக்கு சிவன்-பார்வதி, சிவகாமி சிலைகளை வாங்குவதற்கு சம்மதம் தெரிவித்தார். இதன்படி சிலைகளை தீனதயாளனிடமே விற்று போலீசார் பணம் பெற்றுள்ளனர்.

பூமிக்கு அடியில் இருந்து புதையல் போல கிடைத்த சாமி சிலைகளை அப்போது இன்ஸ்பெக்டராக இருந்த டி.எஸ்.பி. காதர்பாஷாவும், போலீஸ்காரராக பணிபுரிந்த சுப்புராஜும் மீட்டு கொண்டு வந்து சில மாதங்கள் வரை பத்திரமாக பாதுகாத்தனர். அதன் பின்னரே யாருக்கும் தெரியாமல் சிலைகளை விற்பனை செய்ய இருவரும் வியூகம் வகுத்தனர். அப்போதுதான் தீனதயாளன் சிக்கினார். முதலில் சிலைகளை வாங்க மறுத்த அவரை போலீசார் கடுமையாக மிரட்டியது தெரியவந்துள்ளது.

நாங்கள் கொடுக்கும் சிலைகளை வாங்காவிட்டால் மேலும் பல வழக்குகளை சந்திக்க வேண்டி இருக்கும் என்று தீனதயாளனை மிரட்டி பணியவைத்துள்ளனர். தீனதயாளன் கொடுத்த ரூ.25 லட்சம் பணத்தில் போலீஸ்காரர் ஒருவருக்கு சரியாக பங்கு கொடுக்கவில்லை என்று கூறப்படுகிறது. இதன் காரணமாக அவரே காட்டிக் கொடுத்து விட்டார் என்கிற தகவலும் கசிந்துள்ளது.

அதே நேரத்தில் சிலை கடத்தல் வழக்கில் சிக்கிய தீனதயாளனும் போலீசில் அளித்த வாக்குமூலத்தில் போலீசாரிடமிருந்து சிலைகளை வாங்கியது பற்றி புட்டு புட்டு வைத்துள்ளார். இது தொடர்பாக அவர் விரிவாக வாக்குமூலமும் அளித்தார். இதன் பின்னரே போலீசாரின் மீதான பிடி இறுகியது குறிப்பிடத்தக்கது.

சிலை கடத்தல் வழக்கில் சிக்கிய டி.எஸ்.பி. காதர்பாஷாவையும் கைது செய்ய நடவடிக்கை எடுக்கப்பட்டது. அவரை பிடிப்பதற்கு போலீசார் தேடுதல் வேட்டையை முடுக்கி விட்டனர். கீழ்ப்பாக்கத்தில் அவரது வீடு உள்ளது. அங்கு அவரை தேடிச் சென்றனர். ஆனால் அங்கு அவர் இல்லை.

காதர்பாஷா தப்பி ஓடி தலைமறைவாகி விட்டதாக கூறப்பட்டது. ஆனால் அவர் போலீசில் சிக்கிவிட்டதாக தகவல்கள் வெளியானது. இதனை போலீசார் உறுதி செய்யவில்லை.

இதுபற்றி திருவள்ளூர் மாவட்ட குற்றப்பிரிவு வட்டாரத்தில் கேட்டபோது அவர் விடுமுறையில் சென்றிருப்பதாக தெரிவித்தனர். இந்த விவகாரம் தொடர்பாக ஐகோர்ட்டில் வக்கீல் யானை ராஜேந்திரன் தொடர்ந்த வழக்கில் விசாரணையை சி.பி.சி.ஐ.டிக்கு மாற்ற வேண்டும் என்று கோரி இருந்தார்.

இந்த வழக்கு நாளை விசாரணைக்கு வருகிறது. அப்போது ஐ.ஜி.பொன் மாணிக்கவேல் நேரில் ஆஜராகி வழக்கு பற்றிய விவரங்களை தெரிவிக்க உள்ளது குறிப்பிடத்தக்கது.