ஜி.எஸ்.டி.யுடன் வாட் வரியையும் சேர்த்து வசூலிக்கும் வியாபாரிகள்

முறையான பில், வழங்காமல் பெயரளவிற்கு ஏதோ ஒரு துண்டு சீட்டை கொடுத்து ஜி.எஸ்.டி. வரி வசூலிக்கின்றனர். பேக்கரிகளிலும், பழச்சாறு விற்பனை மையங்களிலும் இது போன்ற நிலை காணப்படுகிறது.

ஜி.எஸ்.டிக்கு பிறகு புதிய விலை நிர்ணயிக்கப்பட வேண்டும். ஆனால் அப்படி செய்யாமல் பழைய முறையிலேயே பலர் வியாபாரம் செய்கின்றனர். பழைய சரக்குகளை ஜி.எஸ்.டி.யுடன் வாட் வரியை சேர்த்து வசூலிக்கிறார்கள். ஈகா தியேட்டர் அருகில் உள்ள ஒரு பழக்கடையில் ஜூஸ் குடித்த வாலிபருக்கு 2 சதவீத வாட்வரியும், 6 சதவீத சேவையும் பழைய முறையில் வசூலிக்கப்பட்டது. ஒரு சில இடங்களில் பொருட்கள் வாங்கும் போது வாடிக்கையாளர்களுக்கு பில்லில் தள்ளுபடி வழங்கப்படுகிறது. ஜி.எஸ்.டி.யை ஈடு செய்வதற்காக இந்த தள்ளுபடி வழங்குவதாக தெரிவிக்கப்படுகிறது.

பிரியாணி ஓட்டல்களில் இந்த சிறப்பு சலுகை வழங்கப்படுவதாக வாடிக்கையாளர்கள் தெரிவித்தனர். ஒரு சில வியாபார நிறுவனங்கள் ஏற்கனவே இருப்பு வைத்துள்ள பொருட்களை ஜி.எஸ்.டி.க்கு மாற்றுவதற்கு சிரமப்படுகிறார்கள். தங்களது கம்ப்யூட்டரில் பதிவு செய்யப்பட்டுள்ள பழைய விலைகளை மாற்றம் செய்ய வேண்டும். அதற்கு கால அவகாசம் தேவைப்படுவதோடு சிரமங்களும் உள்ளன. அதனால் ஜி.எஸ்.டி.யுடன் வாட் வரியையும் சேர்த்து வசூலிக்கிறார்கள்.

இதனால் விலை குறைக்கப்பட்ட பொருளுக்கும் அதிக விலை கொடுத்து மக்கள் வாங்க வேண்டிய நிலை உள்ளது. ஜி.எஸ்.டி.யின் நோக்கம் நிறைவேறவும் அதனுடைய பலன் மக்களுக்கு சென்றடையவும் வணிக நிறுவனங்கள், வியாபாரிகள் இதனை எப்படி செயல்படுத்துகிறார்கள் என்பதை தீவிரமாக கண்காணிக்க வேண்டும்.

தவறு செய்யும் நிறுவனங்கள் மீதும், வர்த்தகங்கள் மீதும் கடும் நடவடிக்கை எடுத்தால் தான் குறைந்த விலையில் பொருட்கள் கிடைக்கும் என்று குடியிருப்பு நலச்சங்கங்கள் வலியுறுத்துகின்றன.