காவிரியில் தமிழகத்துக்கு திறந்துவிடப்படும் நீரின் அளவு குறைப்பு: சித்தராமையா பேட்டி

நடப்பு ஆண்டில் பருவமழை இதுவரை சரியாக பெய்யவில்லை. கர்நாடகத்தில் கடந்த ஆண்டும் வறட்சி தீவிரமாக இருந்தது. கடந்த ஆண்டு இதே நாளில் (நேற்று) காவிரியில் உள்ள 4 அணைகளிலும் 53.52 டி.எம்.சி. நீர் இருந்தது. இன்று (நேற்று) 45 டி.எம்.சி. மட்டுமே உள்ளது. அணைகளுக்கு நீர்வரத்தும் கடந்த ஆண்டை விட இப்போது குறைவாக இருக்கிறது. காவிரி படுகையில் மழையும் பெய்யவில்லை.

இதனால் தான் விவசாயிகளின் கோரிக்கையை நிறைவேற்றுவதில் நாங்கள் சற்று தயக்கம் காட்டினோம். அணைகளில் இருந்து தண்ணீரை திறந்துவிட்டவுடன் நெல் நாற்று நடும் பணியை தொடங்கிவிடுகிறார்கள். அதன் பிறகு தண்ணீர் பற்றாக்குறை ஏற்பட்டால் அவர்கள் நஷ்டத்தை அனுபவிப்பார்கள். நெல் விளையும் நிலப்பரப்பு 2.68 லட்சம் ஏக்கராக அதிகரித்து உள்ளது.

நெல், கரும்புக்கு பதிலாக மழையை அடிப்படையாக கொண்ட பயிர்களை விவசாயிகள் பயிரிட வேண்டும். தண்ணீர் கொடுக்க முடியாத நிலை இருப்பதால் முக்கியமாக நெல் பயிரிட வேண்டாம் என்று விவசாயிகளை கேட்டுக்கொள்கிறோம். விவசாயிகள் அரசு எடுக்கும் முடிவுகளுக்கு ஒத்துழைக்க வேண்டும்.

செயற்கை மழை பெய்விக்கும் திட்ட பணிகளையும் விரைவில் தொடங்க உள்ளோம். எங்களிடம் போதுமான அளவுக்கு தண்ணீர் இல்லை. அதனால் தமிழ்நாட்டிற்கு எப்படி தண்ணீரை திறந்துவிடுவது? இருந்தாலும் சிறிதளவு தண்ணீரை தமிழ்நாட்டிற்கு திறந்துவிட்டுள்ளோம். தமிழ்நாட்டிற்கு திறந்துவிடப்பட்டுள்ள காவிரி நீரின் அளவை குறைத்துவிட்டோம்.

இவ்வாறு சித்தராமையா கூறினார்.

குஜராத்தில் நடைபெற்ற டெல்லி மேல்-சபை தேர்தலில் காங்கிரஸ் சார்பில் போட்டியிட்டு வெற்றி பெற்றுள்ள அகமது பட்டேலுக்கு சித்தராமையா வாழ்த்து தெரிவித்தார்.