18 எம்.எல்.ஏ.க்களின் தகுதி நீக்கம் செல்லாது: சேடப்பட்டி முத்தையா பேட்டி

இந்த நிலையில் சபாநாயகரின் உத்தரவு சரியானது தானா? என்ற கேள்வி எழுந்துள்ளது. இதுகுறித்து முன்னாள் சபாநாயகர் சேடப்பட்டி முத்தையாவிடம் கேட்டபோது, அவர் கூறியதாவது:-

கட்சித்தாவல் தடைச் சட்டத்தின் கீழ் நடவடிக்கை எடுப்பது பற்றிய முழு விவரங்களும் அரசியல் சட்டத்தின் 10-வது அட்டவணையிலும், தமிழக சட்டப்பேரவையின் உறுப்பினர் தகுதியிழப்பு விதிகள் 1986-ல் குறிப்பிடப்பட்டுள்ளது.

அதன்படி, ஒரு உறுப்பினர் தகுதி இழப்புக்கு மனு கொடுக்கலாம். அதன் மீது சபாநயகர் எப்படி நடவடிக்கை எடுக்கலாம் என்று முழுமையாக விதிகள் கொடுக்கப்பட்டுள்ளது. கொறடாவிடம் தெரிவிக்காமல் கவர்னரை சந்தித்து மனு கொடுத்தனர் என்பதற்காக அவர்கள் கட்சியில் இருந்து விலகி விட்டனர் என கூற முடியாது. இதுகுறித்து கொறடா கொடுத்த மனு தவறானது.

எனவே 18 எம்.எல்.ஏ.க் கள் தகுதி நீக்கத்திற்கான காரணம் சரியானதல்ல. கட்சித்தாவல் சட்டப்படி தினகரன் அணி எம்.எல்.ஏ.க்கள் மீது நடவடிக்கை எடுக்க முடியாது. இது இயற்கை நியதிக்கு எதிரானது.

தமிழக அரசு பெரும் பான்மையை நிரூபிக்க குறுக்கு வழியில் இறங்கி உள்ளது. நியாயமாக பார்க்க போனால் ஓ.பி.எஸ். அணி மீதுதான் நடவடிக்கை எடுக்கப்படவேண்டும். இந்த பிரச்சினையில் சபாநாயகர் மட்டுமல்லாமல் முதல்-அமைச்சர், அரசு கொறடா ஆகியோரும் நீதிமன்ற கண்டனத்துக்கு ஆளாகநேரிடும்.

இவ்வாறு அவர் கூறினார்.