தினகரன் மீது தேச துரோக வழக்குப்பதிவு செய்யவில்லை: போலீஸ் அதிகாரி விளக்கம்

தினகரன் மற்றும் புகழேந்தியை கைது செய்ய போலீசார் தீவிரமாக இறங்கி உள்ளனர். இதற்காக தனிப்படைகள் அமைக்கப்பட்டுள்ளன.

இதற்கிடையே தினகரன் மீது தேச துரோக வழக்கு பதிவு செய்துள்ளதாக தகவல்கள் வெளியானது. ஆனால் அதனை சேலம் மாநகர போலீஸ் அதிகாரிகள் திட்டவட்டமாக மறுத்தனர்.

இதுகுறித்து மாநகர போலீஸ் உயர் அதிகாரி ஒருவர் கூறியதாவது:-

தேசிய பாதுகாப்பு சட்டத்தின் (என்.எஸ்.ஏ) கீழ் தேச துரோக வழக்கு ஒருவர் மீது பதிவு செய்ய வேண்டுமானால் நாட்டின் இறையாண்மைக்கு எதிராகவும், இருநாடுகளுக்கு இடையே குழப்பதை ஏற்படுத்தும் வகையிலும் செயல்பட்டலோ அல்லது பேசி இருந்தாலோ, அவர்கள் மீது இந்த சட்டத்தின்கீழ் வழக்கு பதிவு செய்ய முடியும்.

இதுதவிர அன்னிய செலவாணி மோசடி வழக்கில் ஈடுபட்டிருந்தாலும் தேசிய பாதுகாப்பு சட்டத்தின் கீழ் வழக்குப்பதிவு செய்யலாம்.

ஆனால், தினகரன் ஆதரவாளர்கள் கொடுத்த துண்டு பிரசுரத்தில் மத்திய, மாநில அரசுகளுக்கு எதிராக வாசகங்கள் இடம் பெற்றிருந்தால் மத்திய, மாநில அரசுகளின் முடிவுகளுக்கு எதிராக செயல்படுதல் என்ற பிரிவின் கீழ் வழக்கு பதிவு செய்யப்பட்டுள்ளது.

மேலும் தினகரன் சம்பவ இடத்துக்கு வராததால் அவர் மீது தேசிய பாதுகாப்பு சட்டத்தின் கீழ் தேச துரோக வழக்கு பதிவு செய்யவில்லை. அதற்கான வாய்ப்புகளும் இல்லை.

இவ்வாறு அவர் கூறினார்.