கரூர்-குளித்தலையில் மருந்து ஆய்வக உரிமையாளர், பெயிண்டர் வெட்டிக்கொலை

கரூர் மற்றும் குளித்தலையில் மருந்து ஆய்வக உரிமையாளர், பெயிண்டர் வெட்டிக்கொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தியுள்ளது.

மாலை மலர்

Published:8th May, 2020 at 4:52 PM

கரூர்:

கரூர் மாவட்டம் குளித்தலை அருகே உள்ள தெற்கு மாடுவிழுந்தான் பாறையை சேர்ந்தவர் சரவணன் (வயது 45). இவருக்கு திருமணமாகி 2 மகன்கள் உள்ளனர். நச்சலூர் பேருந்து நிலையம் அருகே மருந்து ஆய்வகம் நடத்தி வந்தார்.

தினமும் இரவு பணி முடிந்ததும் தனது இரு சக்கர வாகனத்தில் வீட்டிற்கு செல்வது வழக்கம். அதேபோல் நேற்றிரவு பணி முடிந்ததும் அவர் நச்சலூரில் இருந்து வீட்டிற்கு புறப்பட்டார். நச்சலூர்-தெற்கு மாடுவிழுந்தான்பாறை இடைப்பட்ட சாலையில் செல்லும் போது அங்கு வந்த மர்ம நபர்கள் திடீரென சரவணனை வழிமறித்ததுடன், தாங்கள் வைத்திருந்த அரிவாள் உள்ளிட்ட பயங்கர ஆயுதங்களால் சரவணனை சரமாரி வெட்டினர்.

ரத்த வெள்ளத்தில் கீழே சரிந்த சரவணன் சம்பவ இடத்திலேயே துடிதுடித்து இறந்தார். இதையடுத்து மர்ம நபர்கள் அங்கிருந்து தப்பி சென்று விட்டனர்.

இதுகுறித்த தகவல் அறிந்ததும் குளித்தலை போலீஸ் டி.எஸ்.பி. கும்மராஜா மற்றும் போலீசார் சம்பவ இடத்திற்கு சென்று உடலை பார்வையிட்டனர். பின்னர் உடலை மீட்டு பிரேத பரி சோதனைக்காக குளித்தலை அரசு ஆஸ்பத்திரிக்கு அனுப்பி வைத்தனர்.

சரவணனை வெட்டிக் கொலை செய்த மர்ம நபர்கள் யார்? எதற்காக கொலை செய்தனர் என்று தெரியவில்லை. முன் விரோதம் காரணமாக கொலை செய்யப்பட்டிருக்கலாம் என தெரிகிறது. இது தொடர்பாக போலீசார் விசாரணை நடத்தி கொலையாளிகளை தேடி வருகின்றனர். கொலை செய்யப்பட்ட சரவணன், மருத்துவம் படிக்காத நிலையில், தனது மருத்துவ ஆய்வகத்தில் பொதுமக்களுக்கு சிகிச்சை அளித்து வந்துள்ளார். இதனால் சமீபத்தில் அவரை போலீசார் கைது செய்தனர். இந்த நிலையில் அவர் கொலை செய்யப்பட்டு உள்ளது அப்பகுதியில் பரபரப்பை ஏற்படுத்தியுள்ளது.