நேதாஜி சாம்பலை டி.என்.ஏ. பரிசோதனை செய்ய வேண்டும்: அனிதாபோஸ் கோரிக்கை

கடைசி வரை நேதாஜி வேறு எங்கும் காணப்படாததால் அவர் இறந்து விட்டாரா? அல்லது உயிரோடு இருக்கிறாரா? என்பது சர்ச்சையாகவே நீடித்து வந்தது.

இது சம்பந்தமாக பல விசாரணை ஆணையம் அமைக்கப்பட்டு விசாரணையும் நடத்தப்பட்டது. ஆனாலும் நேதாஜி விமான விபத்தில் இறந்தாரா? என்பது இன்னும் உறுதி செய்யப்படவில்லை.

ரெங்கோஜி கோவிலில் உள்ள சாம்பலை எடுத்து செல்லும்படி இந்தியாவிடம் ஜப்பான் தொடர்ந்து வற்புறுத்தி வருகிறது. ஆனாலும், அவரது மரணம் உறுதி செய்யப்படாததால் அதை ஏற்று கொள்ளவில்லை.

ஆங்கிலேயர்களுக்கு எதிராக வெளிநாட்டில் படை திரட்டுவதற்கு முன்பாக சுபாஷ் சந்திரபோஸ் ஜெர்மனிக்கு சென்று ஹிட்லரை சந்தித்தார். பின்னர் அங்கேயே சில ஆண்டுகள் இருந்தார்.

அப்போது ஆஸ்திரிய நாட்டை சேர்ந்த எமிலி என்ற பெண்ணை திருமணம் செய்து கொண்டார். அவர்களுக்கு அனிதா போஸ் என்ற மகள் இருக்கிறார்.

தற்போது அனிதாவுக்கு 75 வயது ஆகிறது. ஜெர்மனியின் பொருளாதார நிபுணராக திகழ்ந்து வருகிறார். சுபாஷ் சந்திரபோஸ் மரணம் அடையவில்லை என்று அனிதாவின் தாயாரும், தான் உயிரோடு இருந்தவரை கூறி வந்தார். அனிதாவும் அதே கருத்தைதான் கூறி வருகிறார்.

இந்த நிலையில் அனிதா போஸ் தனது தந்தையின் மர்மங்கள் குறித்து பிரபல எழுத்தாளர் அசிஸ்ராயுடன் சேர்ந்து ‘லேய்ட் டு ரெஸ்ட்’ என்ற பெயரில் புத்தகம் ஒன்றை எழுதி உள்ளார்.

இந்த புத்தகம் அடுத்த மாதம் 12-ந் தேதி வெளியிடப்பட இருக்கிறது. அதில், தனது தந்தையை பற்றி மர்ம தகவல்களை வெளியிட்டுள்ளார்.

மேலும் ஜப்பானில் உள்ளதாக கூறப்படும் நேதாஜியின் சாம்பலை எடுத்து அதை டி.என்.ஏ. பரிசோதனை செய்ய வேண்டும். இது சம்பந்தமாக இந்திய அரசும், ஜப்பான் அரசும் உரிய முடிவு எடுக்க வேண்டும். அப்படி செய்தால் நேதாஜி மரணத்தின் மர்மம் விலகி விடும் என்று கூறி உள்ளார். #tamilnews