ஐதராபாத்தில் மாம்பழம் சாப்பிட்ட அக்கா, தங்கை பலி

கர்நாடக மாநிலம் பீதரைச் சேர்ந்தவர் வைஜிநாத், இவரது மனைவி இந்துமதி. தம்பதியினர், பிழைப்புக்காக ஐதராபாத் வந்தனர். அவர்கள் வித்தல்வாடியில் வசித்து வந்தனர்.

வைஜிநாத்துக்கு 4 மகள்கள். இவர்களது உறவினர் ரேணுகா என்பவர் சமீபத்தில் நாராயணகுடாவில் உள்ள ஜல்மண்டலி அலுவலகம் அருகே மாம்பழங்களை வாங்கி வந்துள்ளார்.

இந்துமதியும் அவரது 4 மகள்களும் அந்த மாம்பழங்களைச் சாப்பிட்டுள்ளனர். அவர்களுக்கு வாந்தி மற்றும் வயிற்றுப்போக்கு ஏற்பட்டதைத் தொடர்ந்து அவர்கள் 5 பேரும் கச்சிகுடாவில் உள்ள ஒரு தனியார் மருத்துவமனைக்குச் சென்றனர்.

மருத்துவமனையில் சிகிச்சை பெற்று வந்த வைஜிநாத்தின் 3-வது மகள் புவனேஸ்வரி (வயது 17) உயிரிழந்தார். மறுநாள் இளைய மகள் சந்தியா இறந்தார்.