இரவு நேர ஊரடங்கை மீறினால் சட்டப்படி கடும் நடவடிக்கை: பெங்களூரு போலீஸ் கமிஷனா்

இரவு நேர ஊரடங்கு உத்தரவை மீறுபவர்கள் மீது சட்டப்படி கடும் நடவடிக்கை எடுக்கப்படும் என்றும், அரசின் உத்தரவை ஒவ்வொருவரும் பின்பற்ற வேண்டும் என்றும் போலீஸ் கமிஷனா் கமல்பந்த் எச்சரித்துள்ளார்.

மாலை மலர்

Published:28th Dec, 2021 at 8:36 AM

பெங்களூரு :

பெங்களூருவில் நேற்று போலீஸ் கமிஷனர் கமல்பந்த் நிருபர்களுக்கு அளித்த பேட்டியின் போது கூறியதாவது:-

பெங்களூரு உள்பட மாநிலம் முழுவதும் கொரோனா பரவலை தடுக்க நாளை (அதாவது இன்று) முதல் இரவு நேர ஊரடங்கை அரசு அமல்படுத்தி உள்ளது. இரவு 10 மணி முதல் அதிகாலை 5 மணிவரை இந்த ஊரடங்கு அமலில் இருக்கும். இந்த சந்தர்ப்பத்தில் இரவு 10 மணிக்கு பின்பு பெங்களூருவில் தேவையில்லாமல் சுற்றி திரிய யாருக்கும் அனுமதி கிடையாது.

இரவு ஊரடங்கு அமல்படுத்தி இருப்பதால், அந்த நேரத்தில் வெளியே செல்வதற்காக யாருக்கும் தனியாக எந்த விதமான அடையாள அட்டையும் வழங்கப்படாது. அத்தியாவசிய தேவைக்கு மட்டுமே வெளியே செல்ல அனுமதிக்கப்படுவார்கள். அதாவது மருந்து வாங்க மெடிக்கல், உடல் நலக்குறைவால் ஆஸ்பத்திரிக்கு செல்பவர்களுக்கு எந்த பிரச்சினையும் இல்லை.

அதுபோல், இரவு நேரத்தில் பயணம் செய்யும் பொதுமக்கள் ரெயில், விமானம், பஸ் நிலையத்திற்கு சென்றால், அது தொடா்பாக டிக்கெட், பிற ஆவணங்களை போலீசாரிடம் காட்டி செல்லலாம். அரசு பிறப்பித்துள்ள உத்தரவுகள், வழிகாட்டு நெறிமுறைகள் பற்றி நகரில் உள்ள அனைத்து பப், பார்கள், ஓட்டல் உரிமையாளர்களுக்கு தகவல் தெரிவிக்கப்பட்டுள்ளது. பப், பார்களின் உரிமையாளர்களுடன் ஆலோசனையும் நடத்தப்படும்.

அரசின் உத்தரவை அமல்படுத்தி, செயல்படுத்துவது தான் போலீசாரின் கடமையாகும். அதனால் அரசின் உத்தரவை ஒவ்வொரும் கண்டிப்பாக பின்பற்ற வேண்டும். இரவு நேர ஊரடங்கை மீறி தேவையில்லாமல் வெளியே சுற்றி திரிந்தால், சம்பந்தப்பட்டவர்கள் மீது சட்டப்படி நடவடிக்கை எடுக்கப்படும். இதில், எந்த விதமான பாரபட்சமும் பார்க்கப்படாது.