வார இறுதி நாட்களில் வேலையே இல்லை: டிரெண்டாகும் இந்திய வம்சாவளி பெண் தொழிலதிபரின் கொள்கை!

படைப்பாற்றல் என்பது கிணறு போன்றது

தனது தொழில் வாழ்க்கையின் ஆரம்பக் கட்டத்தில் தானும் தினமும் நள்ளிரவு வரை உழைத்து, குடும்ப நேரத்தையும், ஓய்வையும் இழந்ததாகத் தெரிவிக்கும் சாரா, நாளடைவில் தனது சிந்தனையை மாற்றிக் கொண்டார். அதிக மணிநேரம் தொடர்ச்சியாக வேலை செய்வதன் மூலம் சிறந்த படைப்புகள் உருவாக்கப்படுவதில்லை என்றும், போதிய ஓய்வு பெற்ற பின்னரே புதிய மற்றும் சிறந்த யோசனைகள் பிறக்கின்றன என்றும் அவர் சுட்டிக்காட்டுகிறார்.

படைப்பாற்றலை அவர் ஒரு கிணற்றுடன் ஒப்பிட்டுக் கூறுகையில், குழாயைத் திறந்து வைத்தால் நீர் வந்துகொண்டே இருக்கும், ஆனால் கிணறு அப்படிப்பட்டது அல்ல; அதைத் தொடர்ந்து இறைத்துக் கொண்டே இருந்தால் ஒரு கட்டத்தில் நீர் வற்றிவிடும் என்று விளக்கம் அளித்துள்ளார். ஊழியர்களைத் தொடர்ந்து ஓய்வின்றி உழைக்க வைத்தால், அவர்களுடைய படைப்பாற்றல் படிப்படியாகக் குறைந்து, வேலையின் தரம் பாதிக்கப்படும் என்றும் அவர் எச்சரிக்கிறார்.

சர்வதேச அளவில் பாராட்டு

மைக்ரோசாப்ட் ஜப்பான் நிறுவனம் 2019-ஆம் ஆண்டில் பரிசோதனை முறையில் அமல்படுத்திய 4 நாள் வேலை வாரத் திட்டத்தையும் சாரா தனது உரையாடலில் சுட்டிக்காட்டியுள்ளார். ஊழியர்களுக்குக் கூடுதல் ஓய்வு அளிக்கப்பட்டபோது அவர்களின் பணித்திறன் சுமார் 40 சதவீதம் அதிகரித்ததாக அந்த ஆய்வு முடிவுகள் தெரிவிக்கின்றன.

சாரா ஷாமின் இந்த லிங்க்ட்இன் பதிவு தற்போது சமூக வலைதளங்களில் வைரலாகி வருகிறது. பெருநிறுவனங்களின் தீவிர பணி அழுத்தத்திற்கு மத்தியில், ஊழியர்களின் மனநலனுக்கும் பணி-வாழ்க்கை சமநிலைக்கும் முன்னுரிமை அளிக்கும் சாராவின் இந்தத் துணிச்சலான முடிவைப் பல தொழிலதிபர்களும் ஊழியர்களும் பாராட்டி வருகின்றனர்.