டெல்லி தீ விபத்தில் நெஞ்சை பிழியும் சோகம்- நலம் விசாரிக்க வந்த 8 பேர் பலி

ஓட்டல் தீ விபத்து

மருத்துவமனைக்கு அருகிலேயே தங்கி அவரை பார்த்துக் கொள்வதற்காக, அவரின் குடும்பத்தினர் அங்குள்ள ஒரு ஓட்டலில் அறைகளை முன்பதிவு செய்து தங்கியிருந்தனர். ஆனால், துரதிர்ஷ்டவசமாக அந்த ஓட்டலில் ஏற்பட்ட பயங்கர தீ விபத்து, அகர்வால் குடும்பத்தினருக்கு ஒரு மீளாப் பேரழிவாக மாறியது. அந்த ஓட்டலில் தங்கியிருந்த ஒரே குடும்பத்தை சேர்ந்த 8 பேர் இந்த கொடூர தீ விபத்தில் சிக்கி பரிதாபமாக உயிரிழந்தனர். உடல்நலம் குன்றிய நிலையில் மருத்துவமனையில் இருக்கும் அந்த மூத்த குடிமகனுக்கு, தங்களைப் பார்க்க வந்த குடும்பத்தினர் தீ விபத்தில் பலியான இந்த துயரச் சம்பவம் குறித்து உறவினர்கள் இன்னும் தெரிவிக்கவில்லை.

குடும்பத் தலைவரான ராதேஷ்யாமுடன் இருப்பதற்காக, அவரது குடும்ப உறுப்பினர்கள் ராஜஸ்தான், பெங்களூரு மற்றும் குருகிராமில் இருந்து டெல்லிக்கு வந்திருந்தனர். ராதேஷ்யாமின் மனைவி பிரேமலதா (70), பட்டயக் கணக்காளராகவும் (சி.ஏ) தனியார் இன்ஷூடெக் நிறுவனத்தின் தலைமை நிதி அதிகாரியாகவும் பணிபுரிந்த மகன் விவேக் (47), அழகிப் போட்டி பட்டம் வென்று நிகழ்ச்சி மேலாண்மை நிறுவனத்தில் பணிபுரிந்த மருமகள் தர்ஜனி (42) மற்றும் அண்மையில் 10-ம் வகுப்பு தேர்வில் 97 சதவீதம் மதிப்பெண் பெற்றிருந்த பேத்தி வர்யா (16) ஆகியோர் குருகிராமில் இருந்து வந்திருந்தனர்.

பெங்களூருவில் பி.டெக். படித்துக் கொண்டிருந்த இவர்களது மூத்த பேத்தி ஜிவிஷா (20), இந்த விபத்து நடப்பதற்கு சில மணி நேரங்களுக்கு முன்பு தான் விமானத்தில் டெல்லி வந்து சேர்ந்திருந்தார். இவர்கள் அனைவரும் இந்த தீ விபத்தில் பலியாகினர். அவர்களுடன் ராஜஸ்தான் மாநிலம் அஜ்மீரில் இருந்து வந்திருந்த பிரேமலதாவின் சகோதரி கமலா (52), சகோதரர் அசோக் (56) ஆகியோரும் இந்த விபத்தில் சிக்கி உயிரிழந்தனர்.

இவர்களுடன் தங்கியிருந்த மைத்துனர் ஜாவேரி இன்னும் கண்டுபிடிக்கப்படாமல் காணவில்லை என்று தேடப்பட்டு வருகிறார். இவர்கள் முன்னதாகவே தங்களது சொந்த ஊருக்கு திரும்ப திட்டமிட்டிருந்த நிலையில், குடும்பத்தினர் வற்புறுத்தி நீட்டிக்கச் செய்ததால் இந்த விபத்தில் சிக்கிக் கொண்டனர்.