முத்துராமலிங்கதேவர் சிலை தங்க கவசம் அறங்காவலரிடம் ஒப்படைக்கப்படுமா?: வங்கி அதிகாரிகள் ஆலோசனை

கட்சியின் வங்கி கணக்குகளை பொருளாளர்தான் நிர்வாகம் செய்வது என்ற முறையில் திண்டுக்கல் சீனிவாசன் தனது நியமன விவரத்தை வங்கி நிர்வாகிகளுக்கு கடிதம் மூலம் தெரியப்படுத்தினார். ஆனால் அப்போது இந்த நியமனத்திற்கு எதிர்ப்பு தெரிவித்தும், ஜெயலலிதாவால் நியமிக்கப்பட்ட பொருளாளர் நான்தான் என்றும் ஓ.பன்னீர்செல்வம் வங்கிகளுக்கு கடிதம் அனுப்பினார். மேலும் தன்னை பொருளாளர் பதவியில் இருந்து நீக்கியது செல்லாது என்று ஓ.பன்னீர்செல்வம் தொடர்ந்த வழக்கு கோர்ட்டில் நிலுவையில் உள்ளது.

தற்போது ஓ.பன்னீர் செல்வமும், முதல்-அமைச்சர் எடப்பாடி பழனிசாமி தரப்பினரும் ஒன்றாக இணைந்து விட்டாலும் கட்சியின் அவைத்தலைவர், பொதுச்செயலாளர், பொருளாளர் போன்ற முக்கிய பதவிகளில் யாரும் நியமிக்கப்படவில்லை. ஒருங்கிணைப்புக்குழு மட் டுமே அமைக்கப்பட்டுள்ளது.

இந்த நிலையில் தேவர் ஜெயந்தி விழாவுக்கு வழக்கமாக ஒவ்வொரு ஆண்டும் அக்டோபர் மாதம் 26-ந்தேதி வங்கியில் இருந்து தங்க கவசம் எடுக்கப்படும். ஆனால் இந்த முறை தேவர் ஜெயந்தி விழாக்குழுவினர் வங்கியில் தங்க கவசத்தை பெற நேற்று வந்தபோது வங்கி நிர்வாகம் சில விளக்கங்களை கேட்டு அதற்கு உரிய பதிலை எழுத்து பூர்வமாக தரும்படி கூறியதால் தங்க கவசம் பெறுவதில் சிக்கல் ஏற்பட்டது.

மேலும் அ.தி.மு.க. பொருளாளர் யார்? என்பதிலும் குழப்பம் நிலவி வருவதால் அ.தி.மு.க. சார்பிலும் விளக்கம் அளிக்க வங்கி நிர்வாகம் கேட்டுள்ளது. மேலும் தேவர் ஜெயந்தி விழாவுக்கு தங்க கவசத்தை உரிய கால அவகாசத்துக்குள் வழங்குவது குறித்து வங்கி அதிகாரிகள் சென்னையில் உள்ள உயர் அதிகாரிகளிடம் ஆலோசனை நடத்தி வருகிறார்கள்.

அ.தி.மு.க. உயர்மட்ட நிர்வாகிகளிடம் சில நிபந்தனைகளுடன் எழுத்துபூர்வ உறுதிமொழியை பெற்று தேவர் நினைவிட அறங்காவலரான காந்திமீனாள் வசம் தங்க கவசத்தை ஒப்படைக்கவும் ஆலோசித்து வருகிறார்கள்.

நாளை மாலைக்குள் தங்க கவசம் வங்கியில் இருந்து எடுக்கப்பட்டு பசும் பொன்னில் உள்ள தேவர் சிலைக்கு தங்க கவசம் அணிவிக்கப்படும் என்று அ.தி.மு.க. முக்கிய நிர்வாகிகள் தெரிவித்துள்ளனர்.

ஆனால் வங்கி நிர்வாகம் அ.தி.மு.க. நிர்வாகிகளிடம் இந்த முறை தங்க கவசத்தை ஒப்படைக்காமல் அறங்காவலரிடம் வழங்க திட்டமிட்டுள்ளதாக தெரிகிறது. அ.தி.மு.க. நிர்வாகிகளிடம் தங்க கவசத்தை வழங்கினால் சில சட்ட சிக்கல்கள் ஏற்படும் என்றும் வங்கி அதிகாரிகள் கருதுகிறார்கள்.

எனவே தேவர் நினை விட அறங்காவலர் காந்தி மீனாளிடம் தங்க கவசத்தை ஒப்படைப்பதுடன் ஜெயந்தி விழா முடிந்ததும் தங்க கவசத்தை உரிய பாதுகாப்புடன் திருப்பி ஒப்படைக்க உரிய நடவடிக்கையை வங்கி நிர்வாகம் விரைந்து எடுத்து வருவதாக அதிகாரிகள் தெரிவித்துள்ளனர்.