ஒன்றுக்கு மேற்பட்ட ஆயுள் தண்டனையை ஏக காலத்தில்தான் அனுபவிக்க வேண்டும்: அரசியல் சாசன பெஞ்ச் பரபரப்பு தீர்ப்பு

அதன்படி, சுப்ரீம் கோர்ட்டு தலைமை நீதிபதி டி.எஸ்.தாக்குர், நீதிபதிகள் இப்ராகிம் கலிபுல்லா, ஏ.கே.சிக்ரி, எஸ்.ஏ.போப்டே, ஆர்.பானுமதி ஆகியோர் அடங்கிய அரசியல் சாசன பெஞ்ச் இந்த வழக்கை விசாரித்தது.

குற்றவாளிகள் தரப்பில் சுப்ரீம் கோர்ட்டு வக்கீல் சிவபாலமுருகன் ஆஜராகி வாதாடினார். அவர் தன் வாதத்தில், 'ஒரு மனிதருக்கு எட்டு ஆயுள் கிடையாது. ஆயுள் ஒன்றுதான். அப்படி இருக்கும் போது ஒரு மனிதன் எப்படி எட்டு முறை ஆயுள் தண்டனை அனுபவிக்க முடியும்? மேலும் நீதிபரிபாலனம் என்பது ஒரு குற்றவாளியை திருத்துவதற்குத்தான். ஆனால் ஒரு குற்றவாளி விடுதலை பெறுவதற்கு வாய்ப்பே இல்லாத வகையில் தொடர்ச்சியாக சிறை தண்டனை அனுபவிப்பது நீதிபரிபாலனத்தை கேள்விக்கு உரியதாக்கி விடும்' என்று கூறினார்.

அனைத்து தரப்பு வாதங்களையும் கேட்ட நீதிபதிகள் கடந்த ஜனவரி மாதம் 27-ந் தேதி இந்த வழக்கின் மீதான தீர்ப்பை ஒத்திவைத்தனர்.

நேற்று இந்த வழக்கில் நீதிபதிகள் அளித்த தீர்ப்பில் கூறப்பட்டு இருப்பதாவது:-

ஒன்றுக்கு மேற்பட்ட ஆயுள் தண்டனைகளை விதிக்கும்போது அந்த தண்டனைகளை தொடர்ச்சியாக நிறைவேற்றக்கூடாது என்பதை வலியுறுத்துகிறோம். இதுபோன்று அடுக்கடுக்காக ஒரே நேரத்தில் தண்டனை அளிப்பதால் ஒரு குற்றவாளிக்கு சம்பந்தப்பட்ட அரசாங்கம் ஏதேனும் ஒரு சந்தர்ப்பத்தில் விடுதலை அளிக்கலாம் என்ற வாய்ப்பை அது பறித்து விடுகிறது.

ஒரு மனிதனுக்கு இரட்டை மற்றும் அதற்கு மேற்பட்ட ஆயுள் தண்டனைகளை வழங்குவது என்பது நடைமுறையில் சாத்தியமற்ற ஒன்றாகிறது. ஒரு மனிதனுக்கு மற்ற உயிர்களைப் போல ஒரு ஆயுள் மட்டுமே உள்ளது. எனவே, ஒன்றுக்கு மேற்பட்ட ஆயுள் தண்டனை என்பதை ஒருவர் ஒன்றன்பின் ஒன்றாக இல்லாமல், ஏக காலத்தில் மட்டுமே அனுபவிக்குமாறு உத்தரவிடப்பட வேண்டும்.  

ஒரு குறிப்பிட்ட ஆண்டு தண்டனையையும், ஆயுள் தண்டனையையும் ஒரே வழக்கில் விதிக்கலாம். அப்போது, முதலில், குறிப்பிட்ட ஆண்டு தண்டனையை அனுபவித்து விட்டு, பிறகு ஆயுள் தண்டனையை அனுபவிக்குமாறு கூறலாம்.

இவ்வாறு தீர்ப்பில் கூறப்பட்டுள்ளது.