குமரி- தென்காசி மாவட்டத்தில் கொட்டித்தீர்த்த கோடை மழை

கொரோனா ஊரடங்கால் பொதுமக்கள் வீடுகளில் முடங்கியுள்ள இந்த வேளையில் கோடை வெயிலை தாங்க முடியாமல் அவர்கள் அவதிக்குள்ளாகி வருகிறார்கள். இந்தநிலையில் குமரி மற்றும் தென்காசி மாவட்டத்தில் பல இடங்களில் மழை பெய்தது.

மாலை மலர்

Published:24th Apr, 2020 at 12:44 PM

நாகர்கோவில்:

தமிழகம் முழுவதும் தற்போது கோடை வெயில் சுட்டெரித்து வருகிறது. கொரோனா ஊரடங்கால் பொதுமக்கள் வீடுகளில் முடங்கியுள்ள இந்த வேளையில் கோடை வெயிலை தாங்க முடியாமல் அவர்கள் அவதிக்குள்ளாகி வருகிறார்கள்.

இந்தநிலையில் குமரி மாவட்டத்தில் கடந்த சில நாட்களாக கோடை மழை பெய்து வருகிறது. நேற்றும் நாகர்கோவில் உள்பட மாவட்டத்தின் பல பகுதிகளில் இடி-மின்னலுடன் கனமழை கொட்டித் தீர்த்தது. பேச்சிப்பாறை, பெருஞ்சாணி, சிற்றாறு-1, சிற்றாறு-2 அணை பகுதிகளில் சுமார் 2 மணி நேரத்திற்கு மேலாக மழை பெய்தது. சிற்றாறு 2-ல் அதிகபட்சமாக 62 மி.மீ. மழை பதிவாகி உள்ளது.

இரணியல், ஆனைக் கிடங்கு, அடையாமடை, முள்ளங்கினாவிளை, பூதப்பாண்டி ஆகிய பகுதிகளிலும் மழை கொட்டித் தீர்த்தது.

அணைப் பகுதிகளில் கொட்டிவரும் மழையின் காரணமாக பேச்சிப்பாறை, பெருஞ்சாணி அணைகளுக்கு வரக்கூடிய நீர்வரத்து அதிகரித்து உள்ளது.

பேச்சிப்பாறை அணையின் நீர்மட்டம் இன்று காலை 30.30 அடியாக இருந்தது. அணைக்கு 202 கனஅடி தண்ணீர் வந்து கொண்டிருக்கிறது. பெருஞ்சாணி அணையின் நீர்மட்டம் 30.80 அடியாக உள்ளது. அணைக்கு 82 கனஅடி தண்ணீர் வந்துகொண்டிருக்கிறது.