பிரெஞ்ச் ஓபனுக்கு முன்னோட்டமாக கருதப்படும் இத்தாலி ஓபன் சர்வதேச டென்னிஸ் போட்டி ரோம் நகரில் நடந்து வருகிறது. இதில் பெண்கள் இரட்டையர் பிரிவில் நேற்று நடந்த கால்இறுதி ஆட்டம் ஒன்றில் இந்தியாவின் சானியா மிர்சா, கஜகஸ்தானின் யரோஸ்லாவா ஷிவ்டோவா ஜோடி 6-4, 6-1 என்ற நேர் செட்டில் இத்தாலியின் சாரா எர்ரானி - மார்ட்டினா டிரெவிசான் இணையை வீழ்த்தி அரைஇறுதிக்கு முன்னேறியது.
சானியா கூட்டணி அடுத்து மார்ட்டினா ஹிங்கிஸ் (சுவிட்சர்லாந்து)- யங் ஜான் சான் (சீனத்தைபே) ஜோடியுடன் மோத இருக்கிறது. ஒற்றையர் பிரிவில் சிமோனா ஹாலெப் (ருமேனியா) தன்னை எதிர்த்த தகுதி நிலை வீராங்கனை அனெட் கோன்டாவெயிட்டை (எஸ்தோனியா) 6-2, 6-4 என்ற நேர் செட்டில் தோற்கடித்து அரைஇறுதிக்கு தகுதி பெற்றார்.
நடாலை தோற்கடித்த மகிழ்ச்சியில் டொமினிக் திம்.
ஆண்கள் ஒற்றையர் பிரிவின் கால்இறுதி ஆட்டம் ஒன்றில் 7 முறை சாம்பியனான ரபெல் நடால் (ஸ்பெயின்), ஆஸ்திரிய வீரர் டொமினிக் திம்மை எதிர்கொண்டார். 1 மணி 51 நிமிடங்கள் நீடித்த இந்த மோதலில் டொமினிக் திம் 6-4, 6-3 என்ற நேர் செட்டில் நடாலை வீழ்த்தி அதிர்ச்சி அளித்தார். இதன் மூலம் களிமண் தரை போட்டிகளில் தொடர்ச்சியாக 17 ஆட்டங்களில் வெற்றி பெற்றிருந்த நடாலின் வீறுநடையும் முடிவுக்கு வந்தது.