மேகதாதுவில் புதிய அணை கட்ட திட்ட அறிக்கை: கர்நாடக அரசின் முடிவுக்கு மத்திய அரசு ஆட்சேபனை

இந்த திட்டத்திற்கு எக்காரணம் கொண்டும் அனுமதி வழங்கக்கூடாது என்று தமிழக அரசு மத்திய அரசை வலியுறுத்தியுள்ளது. இந்த நிலையில் கர்நாடக அரசின் இந்த திட்டத்திற்கு ஆட்சேபனை தெரிவித்து மத்திய நீர்வள ஆணையம் அதை திருப்பி அனுப்பியுள்ளது. மேலும் ஆட்சேபனை தெரிவித்து ஒரு கடிதத்தையும் எழுதியுள்ளது. அதில் இடம் பெற்றுள்ள தகவல்கள் பற்றி கூறப்படுவதாவது:-

காவிரி நீரை பயன்படுத்துவது குறித்து நூறு ஆண்டுகளுக்கும் மேலாக பிரச்சினை உள்ளது. இந்த பிரச்சினையில் காவிரி நடுவர் மன்றம் தீர்ப்பு வழங்கியது. இதில் காவிரி நீர் மாநிலங்களுக்கு இடையே பங்கீடு செய்யப்பட்டுள்ளது. இதை எதிர்த்து சுப்ரீம் கோர்ட்டில் மாநிலங்கள் மேல்முறையீடு செய்துள்ளன. இந்த மனுக்கள் மீது விசாரணை நடைபெற்று வருகிறது. விரைவில் இதன் மீது தீர்ப்பு வரவுள்ள நிலையில், காவிரி ஆற்றில் புதிதாக ஒரு அணையை கட்டுவது சரியா?