தஞ்சை அருகே காலி குடங்களுடன் பெண்கள் திடீர் சாலை மறியல்

தஞ்சை அருகே உள்ள திருக்கானூர்பட்டி கிராமத்தில் 500-க்கும் மேற்பட்ட குடும்பத்தினர் வசித்து வருகின்றனர். இங்கு கடந்த 3 மாதமாக குடிநீர் வினியோகம் செய்யப்படவில்லை. வாரத்திற்கு ஒரு நாள் லாரி மூலம் மேல்நிலை நீர்த்தேக்க தொட்டிக்கு தண்ணீர் ஏற்றுகின்றனர். ஆனால் மேல்நிலை நீர்தேக்க தொட்டி கடந்த ஒரு வருடமாக சுத்தம் செய்யப்படவில்லை. முற்றிலும் குப்பைகளால் நிரம்பி உள்ளது. கழிவுநீர் கலந்து வருவதால் அந்த தண்ணீரையும் பொதுமக்கள் பயன்படுத்த முடியவில்லை.

இதனை பயன்படுத்தி சில தனியார் லாரிகளில் ஒரு குடம் ரூ.12 முதல் 15 வரை தண்ணீரை விற்பனை செய்து வருகின்றனர். 3 மாதமாக குடிநீர் வினியோகம் இல்லாததால் பொதுமக்கள் மிகவும் அவதியடைந்து வந்தனர். குடிநீருக்காக சுமார் 4 கிலோமீட்டர் தூரம் நடந்து சென்று தண்ணீர் பிடித்து வரக்கூடிய அவல நிலைக்கு பெண்கள் தள்ளப்பட்டனர். இதுகுறித்து வட்டார வளர்ச்சி அதிகாரியிடம் பலமுறை புகார் கொடுத்தும் எந்த நடவடிக்கையும் எடுக்கப்படவில்லை.