தமிழகத்தில் முதல் கட்ட தேர்தலை நடத்த வேண்டும் - தேர்தல் ஆணையத்துக்கு அதிமுக கடிதம்

இதற்காக அ.தி.மு.க. மூத்த நிர்வாகிகள், அமைச் சர்கள், எம்.பி.க்கள், எம்.எல். ஏ.க்களிடம் கையெழுத்து பெறப்பட்டு வருகிறது. அந்த கையெழுத்து படிவங்கள் ஒருங்கிணைக்கப்பட்டு, கடிதமாக தலைமை தேர்தல் ஆணையத்திடம் வழங்கப்படும்.

நாளை (திங்கட்கிழமை) அல்லது ஓரிரு நாட்களில் இந்த கடிதத்தை ஒப்படைக்க ஆளும் அ.தி.மு.க. திட்டமிட்டுள்ளது.

தமிழ்நாட்டில் ஏப்ரல், மே மாதங்களில் கோடை உச்சத்தில் இருக்கும். ஏற்கனவே பருவ மழை பொய்த்துள்ள நிலையில் ஏப்ரல், மே மாதங்களில் கடும் வறட்சி உருவாகும். மேலும் மாநிலத்தின் பல்வேறு பகுதிகளில் குடிநீர் தட்டுப்பாடு ஏற்படும் பேரபாயமும் உள்ளது. எனவே பாராளுமன்ற தேர்தலை தமிழ்நாட்டில் ஒரே கட்டமாக முதல் கட்டமாக நடத்தி முடித்து விட வேண்டும் என்று அந்த கடிதத்தில் வலியுறுத்த அதி.மு.க. தீர்மானித்துள்ளது.

மேலும் தமிழ்நாட்டில் எஸ்.எஸ்.எல்.சி., பிளஸ்-2 பொதுத்தேர்வுகள் மார்ச் மாத இறுதியிலேயே முடிந்து விடும். எனவே தமிழ்நாட்டில் முதல் கட்ட பாராளுமன்ற தேர்தலை நடத்த எந்த இடையூறும் இல்லை என்பதையும் அந்த கடிதத்தில் சுட்டிக்காட்ட இருப்பதாக அ.தி.மு.க. மூத்த தலைவர்களில் ஒருவர் தெரிவித்தார்.

அந்த அ.தி.மு.க. தலைவர் தொடர்ந்து கூறுகையில், “அ.தி.மு.க. சார்பில் தயாரிக்கப்பட்டுள்ள அந்த கடிதத்தில் இன்னும் 10 எம்.பி.க்கள் கையெழுத்திட வேண்டியதுள்ளது. அவர்கள் கையெழுத்து போட்டு முடித்ததும், அந்த கடிதம் தேர்தல் ஆணையத்திடம் ஒப்படைக்கப்படும்” என்றார். அ.தி.மு.க.வின் இந்த கோரிக்கையை தேர்தல் ஆணையம் ஏற்க வாய்ப்பு இருப்பதாக கூறப்படுகிறது. ElectionCommission #ADMK