உடுமலையில் வட்டார போக்குவரத்து அலுவலகம் - பொதுமக்கள் மகிழ்ச்சி

உடுமலை-மடத்துக்குளம் தாலுகாவில் 3 லட்சத்துக்கும் அதிகமான இருசக்கர வாகனங்கள் பல்வேறு வரியினங்கள்‌ செலுத்தும் 3 ஆயிரத்துக்கும் அதிகமான சரக்கு வாகனங்கள் உள்ளன.

ஆண்டுதோறும் வாகனங்கள் எண்ணிக்கை இரு மடங்கு அதிகரித்து வருகிறது. அலுவலகத்தில் நவீன ஒடுதளமும் கட்டப்பட்டு பயன்பாட்டில் உள்ளது.

எனவே வட்டார போக்குவரத்து அலுவலகம் குறித்த அறிவிப்பை அரசு வெளியிட எதிர்பார்ப்பு இருந்து வந்தது. இந்நிலையில் நீண்ட இடைவெளிக்கு பிறகு உடுமலை பிரிவு அலுவலகத்தை வட்டார போக்குவரத்து அலுவலகமாக தரம் உயர்த்தி அரசு உத்தரவிட்டுள்ளது.

உடனடியாக இந்த உத்தரவை செயல்படுத்தும் வகையில் தகவல் பலகை வைக்கவும் அதிகாரிகளுக்கு வழிகாட்டுதல் வழங்கப்பட்டது. இதையடுத்து உடுமலை அலுவலகத்தில் புதிய தகவல் பலகை வைக்கப்பட்டது. 

இதேபோல் வட்டார போக்குவரத்து அலுவலர் உட்பட 9 பணியிடங்கள் உருவாக்கப்பட்டு அலுவலர்கள். பணியாளர்கள் நியமிக்கப்பட உள்ளனர். 

இதனால் சுற்றுலா பர்மிட் உட்பட பல்வேறு பணிகளுக்காக தாராபுரம் வட்டார போக்குவரத்து அலுவலகத்துக்கு உடுமலையை சேர்ந்த வாகன ஓட்டிகள் செல்வது தவிர்க்கப்படும்.

உடனடியாக ஆர் .டி. ஓ.பணியிடத்திற்கு ஏற்ப உடுமலை அலுவலகத்தின் சர்வர் உட்பட தொழில் நுட்பங்களை மாற்றி அமைக்கும் பணி தீவிரமாக மேற்கொள்ளப்பட்டு வருகிறது.

நீண்டகால கோரிக்கை நிறைவேறும் வகையில் அரசு உத்தரவு வெளியாகி உடனடியாக பயன்பாட்டுக்கு வந்துள்ளதால் உடுமலை பகுதி மக்கள் மற்றும் வாகன ஓட்டிகள் மகிழ்ச்சி தெரிவித்துள்ளனர்.