தி.மு.க. கூட்டணி கட்சிக்கு துணை மேயர் பதவி?

5 வார்டுகளில் வெற்றி பெற்றுள்ள காங்கிரஸ் மதுரை மாநகராட்சி துணை மேயர் பதவியை பெற தீவிரமாக முயற்சி செய்துவருகிறது. அதேநேரத்தில் 4 இடங்களில் வெற்றி பெற்றுள்ள மார்க்சிஸ்ட் கம்யூனிஸ்டு கட்சியும் துணை மேயர் பதவியை குறிவைத்து காய்நகர்த்தி வருகிறது. 

எனவே துணை மேயர் பதவியை காங்கிரஸ் அல்லது மார்க்சிஸ்ட் கம்யூனிஸ்டு கட்சிக்கு ஒதுக்குவது குறித்து தி.மு.க. மேலிடம் தீவிரமாக பரிசீலனை செய்து வருவதாகவும் தெரியவந்துள்ளது. மார்க்சிஸ்ட் கம்யூனிஸ்டு  கட்சியின் சார்பில் மதுரை பாராளுமன்ற உறுப்பினர் வெங்கடேசன், தி.மு.க. மேலிடத்தில் பேசி வருகிறார். 

அதே வேளையில் காங்கிரஸ் கட்சிக்கு துணை மேயர் பதவியை கேட்டு மாநிலதலைவர் கே.எஸ்.அழகிரி, திருநாவுக்கரசர் எம்.பி ஆகியோர் தொடர்ந்து அழுத்தம் கொடுத்து வருகிறார்கள். எனவே மதுரை மாநகராட்சி துணை மேயர் பதவியை கூட்டணி  கட்சிக்கு தி.மு.க. விட்டுக்கொடுக்குமா? என்பது ஓரிருநாளில் தெரிந்துவிடும்.

இதனிடையே 15 வார்டுகளை கைப்பற்றியுள்ள அ.தி.மு.க.வுக்கு எதிர்க்கட்சி அந்தஸ்து கிடைக்குமா? என்ற கேள்வியும் தற்போது எழுந்துள்ளது. 100 உறுப்பினர்களைக்கொண்ட மாநகராட்சியில் எதிர்க்கட்சி அந்தஸ்துக்கு எத்தனை கவுன்சிலர்கள் தேவை என்ற விதிமுறைகள் உள்ளாட்சி தேர்தல் ஆணையத்தில் வரையறுக்கப்பட்டு உள்ளதாகவும், அதற்கான அதிகாரபூர்வ தகவல் இன்னும் கிடைக்கவில்லை என்றும் மாநகராட்சி தரப்பில் தெரிவிக்கப்படுகிறது. 

எனவே 15 உறுப்பினர்களைக்கொண்ட அ.தி.மு.க.வுக்கு மதுரை மாநகராட்சியின் எதிர்க்கட்சி அந்தஸ்து கிடைக்குமா? என்ற கேள்வியும் தற்போது எழுந்துள்ளது.