பொலிவு பெறும் புதுமண்டபம்

பறக்கும் குதிரைகள், ராவணன் உள்ளிட்ட பல சிற்பங்கள் சிதிலம் அடைந்து தென்படுகின்றன. மண்டபத்தின் வெளிப்புற கூரையிலும் பல இடங்களில் விரிசல் காணப்படுகிறது. புதுமண்டபத்தை புனரமைப்பது என்று அறநிலையத்துறை முடிவு செய்தது. அங்குள்ள கடைகள் அனைத்தும் அருகில் உள்ள குன்னத்தூர் சத்திரத்துக்கு  மாற்றப்பட்டுவிட்டன. இதனை தொடர்ந்து புதுமண்டபத்தை சீரமைக்கும் பணி தொடங்க உள்ளது.

இதுகுறித்து இந்து சமய அறநிலையத்துறை முதன்மை செயலாளர் சந்திரமோகன் கூறுகையில், “மதுரை புதுமண்டபத்தில் முப்பரிமான அம்சங்களுடன் கூடிய லேசர் விளக்கு பொருத்தி, அங்குள்ள சிற்பங்களின் அழகை சுற்றுலா பயணிகள் முழுமையாக அறியும் வகையில் பொலிவூட்ட உள்ளோம் என்றார்.

மீனாட்சி அம்மன் கோவிலுக்குள் செல்போன் கொண்டு செல்லக்கூடாது என்பதால், புதுமண்டபம் பார்வையாளர்கள் மற்றும் சுற்றுலா பயணிகளுக்கு குறிப்பிடத்தக்க அம்சமாக  திகழும். புதுமண்டபம் புனரமைக்கப்படும்போது அது மதுரையின் பாரம்பரிய வரலாற்றை சுற்றுலாப்பயணிகளுக்கு வெளிப்படுத்துவதாக அமைய வேண்டும் என்று பக்தர்கள்  எதிர்பார்க்கின்றனர்.

மதுரை மீனாட்சி அம்மன் கோவில் ஆளுகைக்குள் புதுமண்டபம் வருகிறது.  கோவில் இணை ஆணையர் செல்லத்துரை  கூறுகையில், “புதுமண்டபத்தில் வணிக கடைகளை அகற்றும் பணி இறுதி கட்டத்தில் உள்ளது. அதன்பிறகு இந்த மண்டபம் புனரமைக்கப்படும்.  இங்கு இடம்பெற்ற உள்ள சிற்பங்கள்  புது பொலிவுடன் மெருகூட்டப்படும். பழந்தமிழர் பாரம்பரிய கட்டிடக்கலைக்கு எடுத்துக்காட்டாக விளங்கும் புதுமண்டபம்,  வரும் காலங்களில் சுற்றுலா பயணிகள் மற்றும் பக்தர்களுக்கு வரப்பிரசாதமாக விளங்கும்“ என்றார்.

புதுமண்டபம் வரலாற்று நிகழ்வுகளை  தன்னகத்தே கொண்டது.   இதனை ஆயிரங்கால் மண்டபம் போலவே பேணி பாதுகாக்க வேண்டும். புதுமண்டபம் புத்தெழுச்சி பெற்ற பிறகு இங்கு மீண்டும் வசந்த விழா கொண்டாட வேண்டும் என்று பக்தர்கள் கோரிக்கை விடுத்தனர்.