தினகரன் தனிக்கட்சி தொடங்குவதாக பொய் பிரசாரம் செய்கின்றனர்: தங்க தமிழ்ச்செல்வன்

எடப்பாடி-ஓ.பி.எஸ். வேண்டுமென்றே சொல்லிக் கொடுத்து தினகரன் கட்சி ஆரம்பிக்க போவதாக பேச வைக்கிறார்கள். இந்த பொய்பிரசாரம் மக்கள் மத்தியில் எடுபடாது.

ஒரு மனிதனுக்கு அழிவு காலம் வரும் போது எரியும் மெழுகுவர்த்தி கூட பிரகாசமாக எரியும் என்பார்கள். அது போலத்தான் எடப்பாடி ஆட்சி செயல்படுகிறது.

முதல்-அமைச்சரை மாற்ற வேண்டும் என்று சொன்னதற்காக 18 எம்.எல்.ஏ.க்களை வீட்டுக்கு அனுப்புகிறார்கள். இந்த ஆட்சிக்கு எதிராக வாக்களித்த ஓ.பி.எஸ்.க்கு துணை முதல்வர் பதவி கொடுக்கிறார்கள்.

எனவே இந்த அரசை எப்படி தூய்மையான அரசாக கூற முடியும்? அதனால்தான் இறுதி கட்ட போராட்டத்தில் டி.டி.வி. தினகரன் இறங்கி உள்ளார். வெற்றியும் பெறுவார்.

நீட் நுழைவுத்தேர்வு விவகாரத்தில் தமிழக அரசுக்கு எதிராக துண்டு பிரசுரம் வழங்கியதாகக் கூறி டி.டி.வி தினகரன், புகழேந்தி உள்ளிட்டவர்கள் மீது தமிழக அரசு உத்தரவின் பேரில் போலீசார் வழக்கு பதிவு செய்து உள்ளனர். தமிழக அரசு தனது அதிகாரத்தை தவறாக பயன்படுத்துகிறது.முடிந்தால் தினகரனை கைது செய்து பார்க்கட்டும். அவர் மீது வழக்கு போட்டு அதன் மூலம் எங்களைப் போன்றவர்களை மிரட்டப் பார்க்கிறார்கள். மக்கள் மத்தியில் அது எடுபடாது.

துண்டு பிரசுரத்தில் தினகரன், புகழேந்தி படம் இருந்ததற்காக வழக்கு போட்டு இருக்கிறார்கள். அந்த துண்டு பிரசுரத்தில் பெரியார், அண்ணா, எம்.ஜி.ஆர்., ஜெயலலிதா, சசிகலா ஆகியோர் படமும் இடம் பெற்று உள்ளது. அவர்கள் மீதும் வழக்கு போடுவார்களா?

இவ்வாறு அவர் கூறினார்.