செய்திகள்

எடப்பாடி பழனிச்சாமி அரசு ஒரு மாதத்தில் கவிழும்: காங்கிரஸ் எம்.எல்.ஏ.க்கள் கருத்து

தமிழகத்தில் எடப்பாடி பழனிச்சாமி ஆட்சி ஒரு மாதத்தில் கவிழ்ந்து விடும் என்று குமரி மாவட்ட காங்கிரஸ் எம்.எல்.ஏ.க்கள் கருத்து தெரிவித்துள்ளனர்.

மாலை மலர்

Published:21st Sep, 2017 at 1:00 PM

நாகர்கோவில்:

தினகரனுக்கு ஆதரவாக செயல்பட்ட அ.தி.மு.க. எம்.எல்.ஏ.க்கள் 18 பேரை சபாநாயகர் தகுதி நீக்கம் செய்தார். இதனால் சட்டசபையில் அ.தி.மு.க. எம்.எல்.ஏ.க்களின் எண்ணிக்கை குறைந்தது. ஆட்சிக்கு தேவையான மெஜாரிட்டியையும் இழந்தது. இதனை சரிக்கட்ட எடப்பாடி தரப்பினர் முயற்சி மேற்கொண்டுள்ளனர்.

தகுதி நீக்கம் செய்யப்பட்ட எம்.எல்.ஏ.க்களை சமரசம் செய்து மீண்டும் எடப்பாடி ஆட்சிக்கு ஆதரவாளர்களாக மாற்றவும் ஏற்பாடுகள் நடந்து வருகிறது.

இதற்கிடையே தமிழக காங்கிரஸ் எம்.எல்.ஏ.க்களை அ.தி.மு.க.வுக்கு ஆதரவாக இழுக்க முயற்சி நடப்பதாக நேற்று தகவல் வெளியானது. உளவுத்துறை மூலம் இந்த முயற்சி நடப்பதாகவும் கூறப்பட்டது.

காங்கிரஸ் கட்சிக்கு இப்போது 8 எம்.எல்.ஏ.க்கள் உள்ளனர். இவர்களின் ஆதரவு எடப்பாடி அணிக்கு கிடைத்தால் அவர்களின் எண்ணிக்கை 114-ல் இருந்து 122 ஆக உயரும். இது சட்டசபையில் தனி மெஜாரிட்டிக்கும் அதிகமான பலமாகும்.

காங்கிரஸ் கட்சிக்கு குமரி மாவட்டத்தில் மட்டும் 3 எம்.எல்.ஏ.க்கள் உள்ளனர். இவர்கள் உள்பட 8 எம்.எல்.ஏ.க்களையும் நேற்று தமிழக காங்கிரஸ் தலைவர் திருநாவுக்கரசர் அவசரமாக அழைத்து ஆலோசனை நடத்தினார்.

அ.தி.மு.க. எம்.எல்.ஏ.க்கள் 18 பேரை தகுதி நீக்கம் செய்தது தொடர்பான வழக்கு வருகிற 4-ந்தேதிக்கு ஒத்தி வைக்கப்பட்டுள்ளது. அப்போது வழக்கு விசாரணை நடந்து என்ன தீர்ப்பு வந்தாலும் அதை எதிர்த்து மேல் முறையீடு செய்வார்கள். அங்கு இந்த வழக்கின் விசாரணை முடிந்து இறுதி தீர்ப்பு வெளியாக ஒரு மாதமோ அல்லது சில மாதங்களோ ஆகலாம். அதற்குள் தமிழகத்தில் தற்போது நடைபெறும் எடப்பாடி ஆட்சி கவிழ்ந்து விடும். அதில், எந்த சந்தேகமும் இல்லை.