நானும், ஓ.பன்னீர்செல்வமும் கட்சி- ஆட்சியை என்றும் கட்டிக்காப்போம்: முதலமைச்சர் பேச்சு

அரசியல் தலைவர் ஆயிரம் பேர் உருவாகலாம். ஆனால் மக்கள் தலைவர் எப்போதாவது தான் உருவாகுவார்கள் அப்படி உருவானவர் தான் எம்.ஜி.ஆர். அவர்கள். அதுபோல தாய் குலத்தின் மீது மிகுந்த அக்கறை கொண்டவர் எம்.ஜி.ஆர். தான். அதேபோன்று ஒரு குடும்பத்தின் ஆட்சி, அதிகாரத்தை ஒழித்தவர் முன்னாள் முதல்-அமைச்சர் ஜெயலலிதான். எத்தனை வே‌ஷங்கள் போட்டாலும் மக்களின் கண்களுக்கு எக்ஸ்ரே போன்று நன்றாக தெரியும். எங்களுக்கு என்றுமே தோல்வி கிடையாது. ஏனென்றால் எங்களை வளர்த்த தலைவர்கள் அப்படி. எங்களின் சொல்வாக்கு சுத்தமாக இருக்கும். அதனால் தான் மக்களிடம் எங்களுக்கு செல்வாக்கு உள்ளது.

தமிழகத்தில் வறட்சி வந்தாலும் ஆட்சியை கலைக்க வேண்டும் என்றும், மழை வந்தாலும் ஆட்சியை கலைக்க வேண்டும் என்று எதிர்கட்சி தலைவர் மு.க.ஸ்டாலின் கூறுகிறார். ஸ்டாலின் சென்னையின் மேயராகவும், துணை முதல்-அமைச்சராகவும், உள்ளாட்சித்துறை அமைச்சராகவும் இருந்த போது சென்னை மாநகரத்தை பற்றி ஏன் சிந்திக்கவில்லை. இப்போது கொளத்தூர் சென்று வருபவர் இதை அப்போதே சென்று சென்னை மாநகர பிரச்சனையை சரிசெய்திருக்கலாமே. இவரை மக்கள் மறந்ததால் தான் தற்போது எதிர்க்கட்சி தலைவராக உள்ளார். அதேபோன்று உள்ளாட்சி தேர்தல் நடைபெறுவதை தி.மு.க. தான் தடுத்தது.