பாராளுமன்ற கூட்டம் முடிந்ததும் பா.ஜ.க. கூட்டணிக்கு முழுக்கு - சந்திரபாபு நாயுடு முடிவு

அதன்படி தெலுங்குதேசம் மத்திய மந்திரிகள் அசோக் கஜபதி ராஜு, சுஜனா சவுத்திரி இருவரும் நேற்று மாலை பிரதமர் மோடியை சந்தித்து தங்களது பதவியை ராஜினாமா செய்து கடிதம் கொடுத்தனர்.

இதற்கு பதிலடி கொடுக்கும் வகையில் ஆந்திராவில் தெலுங்கு தேசம் அமைச்சரவையில் இடம் பெற்றிருந்த பா.ஜ.க. மந்திரிகள் மாணிக்கியால ராவ், காமிரேனி சீனிவாஸ் இருவரும் தங்கள் பதவியை ராஜினாமா செய்து கடிதம் கொடுத்தனர். அதை சந்திரபாபு நாயுடு உடனடியாக ஏற்றுக் கொண்டார்.

இதற்கிடையே சந்திரபாபு நாயுடுவை சமரசம் செய்யும் முயற்சியில் பிரதமர் மோடி ஈடுபட்டார். தொலைபேசியில் அவர் சந்திரபாபு நாயுடுவுடன் பேசினார். ஆனால் அந்த சமரச முயற்சி தோல்வியில் முடிந்தது.

இதையடுத்து சிறப்பு அந்தஸ்து பெறும் விவகாரத்தில் அடுத்தக் கட்டமாக என்ன நடவடிக்கை எடுக்கலாம் என்று ஆலோசித்து வருகிறார். அடுத்த ஆண்டு (2019) பாராளுமன்றத்துக்கு தேர்தல் நடைபெற உள்ள நிலையில் முக்கிய முடிவுகள் எடுக்க வேண்டும் என்று அவர் திட்டமிட்டுள்ளார்.

தேர்தலின்போது ஆந்திர மாநில மக்களை எதிர்கொள்ள வேண்டுமானால் பா.ஜ.க. கூட்டணியில் இருந்து உடனே விலக வேண்டும் என்று தெலுங்கு தேசம் மூத்த தலைவர்கள் வலியுறுத்தி வருகிறார்கள். இதை ஏற்று கொண்டுள்ள சந்திரபாபு நாயுடு பாராளுமன்ற கூட்டத்தொடர் முடிந்ததும், இது தொடர்பான அறிவிப்பை வெளியிடுவார் என்று எதிர்பார்க்கப்படுகிறது.

பாராளுமன்ற கூட்டத்தொடர் ஏப்ரல் 6-ந்தேதி நிறைவு பெறுகிறது. எனவே ஏப்ரல் இரண்டாவது வாரம் பா.ஜ.க. கூட்டணிக்கு நிரந்தரமாக முழுக்கு போடும் அறிவிப்பை சந்திரபாபு நாயுடு வெளியிடுவார் என்று தெரிகிறது.

அதன் பிறகு சந்திரபாபு நாயுடு மூன்றாவது அணியில் தீவிரம் காட்டுவார் என்று கூறப்படுகிறது. #tamilnews