குமரி மாவட்டத்தில் நடமாடும் ஏடிஎம் போன்று தபால்காரர் மூலம் பண பரிவர்த்தனை

தபால் துறையில் இந்தியா போஸ்ட் பேமண்ட்ஸ் திட்டம் அறிமுகம் செய்யப்பட்டு உள்ளது. இதன் சிறப்பம்சம் என்னவென்றால் பணத் தேவைக்காக மக்கள் வெகுதூரம் அலையவோ அல்லது காத்திருக்கவோ வேண்டாம். நடமாடும் ஏ.டி.எம். போல தபால்காரர் மக்களை தேடி வந்து பணம் வழங்குவார். ஆதார் எண் இணைக்கப்பட்டு உள்ள வங்கி கணக்கில் இருந்து தபால்காரர் மூலம் பணப் பரிவர்த்தனை செய்யலாம்.

இந்த சேவையை பெற ஆதார் எண் மற்றும் செல்போன் எண் மட்டும் போதும். இந்த திட்டம் மூலம் உங்களது பணம் பாதுகாப்பாக உங்களை வந்தடையும். இந்த சேவையை நகர்ப்புறம், கிராமப்புறங்களில் தபால்காரர்கள் மூலமும் பெற முடியும். முதியோர் ஓய்வூதியம் வாங்குபவர்கள், 100 நாள் வேலைக்கு செல்வோர், கியாஸ் மானியம் பெறுவோர், மத்திய, மாநில அரசின் நலத்திட்ட உதவிகளை பெறுவோர் என பலதரப்பட்டவர்கள் இதன் மூலம் பயனடைவர்.