பாகிஸ்தானில் இருந்து இந்தியா தப்பி வந்த கீதாவை சொந்தம் கொண்டாடும் தம்பதி

இதற்கிடையே பாகிஸ்தானில் வளர்ந்த பெரிய பெண்ணான கீதாவை இந்தியாவுக்கு அழைத்து வந்து பெற்றோரிடம் ஒப்படைக்க வெளியுறவுத்துறை மந்திரி சுஷ்மா சுவராஜ் நடவடிக்கை எடுத்தார். கடந்த 2015-ம் ஆண்டு அக்டோபர் மாதம் 26-ந்தேதி கீதா விமானம் மூலம் டெல்லி திரும்பினார்.

டெல்லி விமான நிலையத்தில் மகளை தந்தை ஜனார்த்தனன் மகாதோ, வளர்ப்பு தாய் ஆகியோர் வரவேற்று அழைத்துச் சென்றார்கள். பின்னர் கீதா பெற்றோருடன் மத்திய மந்திரி சுஷ்மா சுவராஜை சந்தித்து நன்றி தெரிவித்தார். கீதாவின் பெற்றோருக்கு சுஷ்மா சுவராஜ் ரூ.1 லட்சம் நிதி உதவி வழங்கினார்.

இந்த நிலையில் பீகார் மாநிலம் அலிநகர் என்ற கிராமத்தைச் சேர்ந்த ராம்ஸ்வரூப் சவுத்திரி- சிந்தாதேவி தம்பதி கீதாவை தங்களது மகள் என்று சொந்தம் கொண்டாடியுள்ளது. அவர்கள் கூறியதாவது:-

அரியானா மாநிலம் கர்ணாலில் இருந்து ரெயிலில் ஊருக்கு புறப்பட்ட போது கீதா காணாமல் போய்விட்டாள். அவளது பெயர் அப்போது பூஜா, பல வருடங்கள் ஆகியும் மகள் கிடைக்காததால் வேதனை அடைந்தோம். தற்போது கீதா என்ற பெயரில் இந்தியா திரும்பி இருக்கிறார்.

நாங்கள் அவளை டி.வி.யில் பார்த்த போது எங்கள் மகள் பூஜாதான் என்று உறுதியாக தெரிய வந்தது. கீதா எங்களைப் பார்த்தால் அடையாளம் கண்டு கொள்வாள். கீதாவின் தலையில் மச்சமும், வெட்டு தழும்பும் காணப்படும். பக்கத்து வீட்டுக்காரர்கள் கூட கீதாவை டி.வி.யில் பார்த்து விட்டு இவள்தான் பூஜா என்று அடையாளம் காட்டினார்கள்.

இவ்வாறு தெரிவித்தனர்.

கீதாவுக்கு சொந்தம் கொண்டாடும் தம்பதி கூலி வேலை செய்து வரும் தொழிலாளர்கள் ஆவார்கள். அவர்கள் கீதாவுக்கு உரிமை கோரி இருப்பது திருப்பத்தை ஏற்படுத்தி உள்ளது.