விநாயகர் ஊர்வலத்தில் ‘இடி மன்னர்கள்’ - பொறிவைத்து கைது செய்த பெண் போலீசார்

இவர்களின் இம்சையை சகிக்க முடியாமல் மூச்சுத்திணறும் பெண்களில் சிலர் கொதித்தெழுந்து திட்டித் தீர்ப்பதுண்டு. பொறுக்கிகளுடன் நமக்கெதற்கு வம்பு? என்று பல பெண்கள் விலகிப்போய் விடுவதும் உண்டு. கோவில் திருவிழா, பரபப்பான மார்க்கெட் பகுதிகளில் காங்கேயம் காளைகள் போல கட்டுப்பாடின்றி திரியும் இந்த திணவெடுத்த கும்பல் சமீபத்தில் ஐதராபாத் நகரில் நடைபெற்ற விநாயகர் சிலைகள் கரைப்பு ஊர்வலத்தில் கலந்துகொண்டு சிறுமிகள், பெண்களை பாலியல்ரீதியாக துன்புறுத்தியது.

தெலுங்கானா மாநிலத்தில் வெளியே செல்லும் பெண்களின் பாதுகாப்புக்கு என ‘ஷிடீம்’ என்ற பெயரில் பெண் போலீஸ் பறக்கும் படை உருவாக்கப்பட்டுள்ளது. ஐதராபாத் நகரில் நடைபெற்ற விநாயகர் சிலைகள் கரைப்பு ஊர்வலத்தின்போது பாதுகாப்பு பணியில் ஈடுபட்டிருந்த இந்த சிறப்பு படையினர் சிறுமிகள் மற்றும் பெண்களிடம் கேவலமான முறையில் நடந்துகொண்ட கும்பலை கண்காணித்தனர்.