கன்னட திரையுலகை சேர்ந்தவர் சஞ்ஜாரி விஜய். சுமார் 20க்கும் மேற்பட்ட படங்களில் நடித்துள்ள இவர், கடந்த 2015-ம் ஆண்டு சிறந்த நடிகருக்கான தேசிய விருதும் பெற்றுள்ளார். பெங்களூருவில் வசித்து வந்த இவர், கடந்த சில தினங்களுக்கு முன்னர் நண்பருடன் இருசக்கர வாகனத்தில் சென்றபோது மின்கம்பத்தில் மோதி விபத்தில் சிக்கினார். இதையடுத்து மருத்துவமனையில் அனுமதிக்கப்பட்ட நடிகர் சஞ்ஜாரி விஜய், உயிருக்கு ஆபத்தான நிலையில் சிகிச்சை பெற்று வந்தார்.
சஞ்ஜாரி விஜய்
இந்நிலையில், அவர் சிகிச்சை பலனின்றி உயிரிழந்துள்ளார். அவருக்கு வயது 38. நடிகர் சஞ்ஜாரி விஜய், மூளைச் சாவு அடைந்ததை அடுத்து, அவரது உடல் உறுப்புகளை தானம் செய்ய உள்ளதாக உறவினர்கள் அறிவித்துள்ளனர். அவரின் திடீர் மறைவு கன்னட திரையுலகினரிடையே பெரும் சோகத்தை ஏற்படுத்தி உள்ளது. கிச்சா சுதீப் உள்ளிட்ட பிரபலங்கள் சஞ்ஜாரி விஜய்யின் மறைவுக்கு இரங்கல் தெரிவித்துள்ளனர்.